2026 жылғы 19 маусым күні сағат 13:10 шамасында алдын ала алынған жедел ақпаратты іске асыру барысында Тараз қаласындағы №59 мекемесінің қызметкерлері мен ВЧ-5513 әскери бөлімінің бақылау-өткізу тобының қызметкерлері қысқа мерзімді кездесу үшін келген азаматтың жеке заттарын тексеру кезінде тыйым салынған затты анықтады.
Тексеру барысында келушінің жеке заттарының арасынан жасырын аудио және бейнежазба құрылғысымен жабдықталған қара түсті көзілдірік табылды. Аталған азамат тексеру басталар алдында тыйым салынған заттарды өз еркімен тапсыру қажеттігі туралы ескертілген болатын.
Аталған дерек бойынша материалдар белгіленген тәртіппен тіркеліп, оқиға орнына жедел-тергеу тобы шақырылды. Сонымен қатар бұл туралы тиісті уәкілетті органдарға хабар берілді.
Жиналған материалдар Қазақстан Республикасы Әкімшілік құқық бұзушылық туралы кодексінің 481-бабы бойынша құқықтық баға беру және әкімшілік жауапкершілікке тарту мәселесін қарау үшін сотқа жолданды.
Қылмыстық-атқару жүйесі мекемелеріне тыйым салынған заттарды алып өту әрекеттерінің жолы кесіліп, қауіпсіздік талаптарының сақталуы тұрақты бақылауда.
