Жуалы ауданындағы 100 МВт-ты құрайтын күн электр стансасы 7 жылдан бері толық қуатында жұмыс істеп келеді. Стансаның алғашқы бөлігі 2015 жылы пайдалануға берілген. Ол жобаның жалпы құны 23,5 млд теңге. Стансаға қажетті құрал-жабдықтар, фотоэлектрлі панельдер құрылыс алаңына Германиядан жеткізіліп орналастырылған еді. Жалпы алаңы 150 га-ды алып жатқан «Бурное солар-1» күн электр стансасының қуаттылығы 50 МВт-ты құрайды.
Бұл стансаның тұсауы 2015 жылдың 2 шілдесінде Тұңғыш Президентіміз-Елбасы Н.Назарбаевтың қатысуымен өткен «Индустрияландыру күні» ұлттық телекөпірі арқылы Үдемелі индустриалды-инновациялық даму бағдарламасы аясында кесілген. Содан бері күн электр стансасының табысы жыл санап артуда. Бұл кәсіпорын өткен жылы 3 089,4 млн теңгегенің 80 069 кВт электр энергиясын өндірген. Биыл да өнім көлемі артпаса төмендей қойған жоқ.
Ал 2016 жылы «Бурное солар-2» күн электр стансасы құрылысының екінші кезеңі басталып, оған алғашқы стансаның жанынан (Нұрлыкент ауылдық округіне қарасты жер телімінен) 151,8 га жер телімі бөлінді. Оған бөлінген қаражат 25 млд теңге. Аталған жобаның инвесторы «Самұрық Қазына-Юнайтед Грин» ЖШС, ал қаржыландыру көзі – Лондондағы «Европалық қайтажаңғырту және даму банкі». Бұл кешен аумағында «jinko Solar» компаниясының 185 174 фотоэлектрлік модулі және «Sungrow» өндірісінің 16 инверторлық стансасы жұмыс істеуде.
Стансаның екінші кезеңі де Н.Назарбаевтың қатысуымен 2018 жылдың қарашасында өткен «Индустрияландыру күні» ұлттық телекөпірі арқылы ашылған болатын. Стансадағы электр энергиясының жылдық болжамы өндіріс сағатына 78,2 млн кВт-ты құрайды. Бұл шамамен 40 мың тұрғын үйді электр энергиясымен қамтамасыз етуге мүмкіндік береді.
«Бурное солар – 1» және «Бурное солар – 2» ЖШС күн электр стансасының бас директоры Нұрлан Қапеновтың айтуынша, күн электр стансасының электр өндіру қуаты жыл санап артуда. Серіктестік 3 жыл бұрын Еуропалық қайта құру және даму банкі EMEA Finance тарапынан «Бурное солар -2» жобасы бойынша «Күн энергиясы саласындағы үздік мәмле» номинациясы бойынша марапатқа ие болыпты.
