Олар – бүгінде өзінің біліміне, шәкіртақысына немесе ата-анасы мен туыстарының көмегі мен қолдауына ғана сенетін қатардағы қарапайым студент немесе жас маман. Қоғамға дендеп еніп бара жатқан нарықтық қарым-қатынас пен жаһандану барысында жастар өз-өзін сенімсіз, бөтен әлемдегідей сезінуі ғажап емес. Бүгінгі жаһандану дәуірінде жастарымыздың қоғамның жаңару үрдісімен үйлесімді өмір сүре білуі үшін олардың тәрбиесіне айрықша зор мән берілуі керек-ақ. Жастардың құқықтық сауатын көтеру мәселесінің де орны ерекше. Өйткені, құқықтық тәрбие ең алдымен жаңа тұрпатты адамды, азаматты қалыптастыру ісіне қызмет етеді.
Осыған орай жақында Түркістан облысы Қазығұрт ауданы әкімдігінің қолдауымен және аудандық “Жастар ресурстық орталығы” КММ-нің ұйымдастыруымен «Туған жер – ұлы бабалар аманаты» атты республикалық пікірсайыс турнирі сәтті өтті.
Турнир мақсаты — жастар арасында сөйлеу мәдениетін, шешендік өнерді дамыту, ұлттық құндылықтарды дәріптеу және туған жерге деген сүйіспеншілікті арттыру.
Ерекше форматта өткен бұл турнир қазақ халқының рухани байлығы мен ұлттық салт-дәстүрлерін насихаттап, қатысушыларға ерекше шабыт сыйлады. Дәстүрлі киім үлгілері мен ұлттық нақыштағы безендірулер турнирді тарихи мәдени шараға айналдырды.
Турнир нәтижелері:
1 орын – “Ынталы” фракциясы, Жарылқасын Арман, Қуанышбек Бекжан (Алматы облысы) 200,000 теңге;
2 орын – “Майлыошақ” фракциясы, Құрманалиев Рахымжан (Алматы облысы), Әзімхан Бекарыс (Шымкент қаласы) 100,000 теңге;
3 орын – “Жаңабазар” фракциясы, Махамбет Бегзатхан, Кемелбек Аянат Бағдатқызы (Қызылорда облысы) 70,000 теңге;
3 орын — “Амангелді” фракциясы, Тлеумұратов Нұрдәулет, Есенғали Нұрай (Тараз қаласы) 70,000 теңге;
Ақсақал лигасы:
Ең үздік спикер – Смағұл Арайлым (Түркістан облысы) 30,000 теңге;
Үздік спикер – Тоқберген Азамат (Астана) 15,000 теңге;
Бозбала лигасы:
Ең үздік спикер – Әділбай Ратжан (Шымкент қаласы) 20,000 теңге;
Үздік спикер – Жүніс Ынтымақ (Ақмола облысы) 10,000 теңге;
Ең үздік төреші — Қалқабай Нұрмұхамет (Шымкент қаласы) 30,000 теңге;
Үздік төреші — Тағаев Арынғазы (Сарыағаш ауданы) 15,000 теңге;
Турнирге еліміздің 8 өңірінен келген 32 фракция қатысты. Олар туған жер, ел тарихы, ұлт болашағы сияқты өзекті тақырыптарды талқылап, аналитикалық және ораторлық қабілеттерін жоғары деңгейде көрсетті.
Бұл бастама жастардың шығармашылық және интеллектуалдық әлеуетін дамытуға, ұлттық рухты нығайтуға, сондай-ақ қоғамдық және әлеуметтік өмірге белсенді араласуына ықпал етті.
Ал, Сайрам ауданында жастарды отансүйгіштікке тәрбиелейтін кинотуындылар көрсетілімі өтті. Сайрам ауданының әкімдігінде жастардың патриоттық сезімін нығайту мақсатында маңызды іс-шаралар легі күні бүгінге дейін жалғасын тауып келеді.
Осы орайда, аудандық мәдениет, тілдерді дамыту, дене шынықтыру және спорт бөлімінің ұйымдастыруымен Сиқым, Жібек Жолы, Манкент ауылдық клубтары. Ақбұлақ ауылдық мәдениет үйі және Ақарыс ауылдық клубында жоғары тәрбиелік және идеологиялық мағынаға ие кинофильмдер көрсетілді.
Көрсетілімдердегі маңызды сәттерге келсек, Сиқым ауылдық клубында №47 «Амангелді» жалпы білім беретін мектебінің педагог-ұйымдастырушысы Салтанат Бегалиева сөз сөйлеп, жастарды тәрбиелік құндылықтарға мән беруге шақырды.
Келесі кезекте Манкент ауылдық клубындағы көрсетілімде №11 «Манкент» жалпы білім беретін мектебінің тәрбие ісі жөніндегі орынбасары Сайдахмет Раимбердиев жастарды отансүйгіштікке, бірлікке және жауапкершілікке шақырып, фильмнің тәрбиелік маңызын ерекше атап өтті.
Бұдан соң Ақарыс ауылдық клубында №31 «Бәйдібек ата» жалпы білім беретін мектебінің мұғалімі Салтанат Әшенова сөз сөйлеп, ұлттық құндылықтарды насихаттаудың маңыздылығын айқындады.
Ал Ақбұлақ ауылдық мәдениет үйінде Ақбұлақ ауылдық округінің әкімі Мұрат Оразбаев жастарға рухани тәрбие берудің маңызы жайлы терең ой қозғап, қатысушыларды жігерлендірді.
Аудан аумағындағы мәдени ошақтарда ұйымдастырылған көрсетілімдердің жалпы мақсаты — жастардың бойында отансүйгіштік сезімді нығайту, елге, жерге деген сүйіспеншілікті ояту және ұлттық құндылықтарды дәріптеуге бағытталды.
Жастар және жауапкершілік. Иә, жастарға көп жауапкершілік жүктелген. Осыған орай Жетісай ауданы әкімдігі жанынан құрылған қоғамдық қауіпсіздікті қамтамасыз етудегі ведомствоаралық топтың мүшелері Ғ.Мұратбаев атындағы Жетісай гуманитарлық педагогикалық колледжінде жиналыс өткізіп, жастардың қауіпсіздігін қамтамасыз ету жолында маңызды пікір алмасу өткізді.
Жиналысқа Жетісай АПБ ЖПҚ учаскелік полиция инспекторы, полиция подполковнигі Б.Абдурахманов, Жетісай аудандық Жастар ресурстық орталығының психологі Ж.Қайратқызы және «КММ-нің инспекторы А.Әмір мен Б.Тұрташ,Жетісай АПБ ЖПҚ, ӘЗЗҚТ инспекторы, полиция капитаны Е.Туреханов, Жетісай АПБ ЮПТ полиция капитаны Е.Носербаев, Жетісай ауданының прокуратурасының прокуроры қатысты.
Жиналыс барысында Б.Абдурахманов интернет-алаяқтық мәселелеріне тоқталып, жасөспірімдер арасындағы қылмыс пен құқық бұзушылықтардың алдын алу жолдарын талқылады. «Түнгі бала» жедел профилактикалық іс-шарасының өтіп жатқанына назар аударды. Сонымен қатар, интернетте кездесетін алаяқтық әдістері мен оларға қарсы тұру тәсілдерін, соның ішінде «Банктік несие алудан ерікті түрде 6 айға бас тарту» қызметін түсіндірді. Жастарға интернет алаяқтықтың құрбаны болған жағдайда 102 номеріне хабарласу керектігін еске салды.
Жетісай АПБ ЖПҚ, ӘЗЗҚТ инспекторы, полиция капитаны Е.Туреханов зорлық-зомбылық — қоғамдағы ең өзекті мәселелердің бірі екендігін атап өтті. Зорлық-зомбылықтың физикалық, психологиялық және экономикалық түрлерге бөлінетіндігін айтты. Зорлық көрсетудің себептері түрлі факторларға байланысты, соның ішінде әлеуметтік, мәдени және экономикалық жағдайлар бар. Әрбір азамат зорлық-зомбылықты қабылдамай, бірлесе күресуі тиіс. Біз зорлық-зомбылыққа нөлдік төзбеушілікті қалыптастыруымыз керектігін,сонымен қатар 25 қараша мен 10 желтоқсан аралығында «зорлық-зомбылықсыз 16 күн» республикалық акциясы өтіп жатқаны туралы атап өтті.
Сонымен қатар, теріс діни ағымдардың жастар арасында таралуы және жалған хабарламалардың әсері де ескерілді. Діннің теріс әсерін түсіну, жастардың ақпаратты дұрыс қабылдау қабілеттерін дамыту — қазіргі қоғамда маңызды міндеттердің бірі. Зорлық-зомбылық, лудомания (ойынға тәуелділік) мен интернет алаяқтық, кибербуллинг пен буллинг сияқты мәселелерге қарсы тұру үшін жастарды ақпараттандыру және оларға құқықтық білім беру — басты міндет болып табылады деді.
Жиналыс соңында қатысушыларға арнайы дайындалған жаднамалар таратылып, тақырыптық бейнероликтер көрсетілді. Бұл іс-шара жастардың қауіпсіздігі мен құқықтық сауаттылығын арттыруға бағытталған маңызды қадам болып, өткізілген жиналыс жастарымыздың болашағын жарқын ету жолындағы дұрыс бағыт берді.
