Қазақ боксшысы Жанқош Тұраровтың бүгін (3 сәуір) өтуі тиіс БАӘ-дегі жекпе-жегі өтпейтін болды. Ол бірінші жартылай орта салмақтағы WBO Inter-Continental белбеуін ұлыбританиялық Тайрон Маккеннаға (21-2-1, 6 КО) қарсы жекпе-жекте қорғау керек болған. Бұған спортшының коронавирусқа шалдығуы себеп болып отыр. Бұл туралы спортшы Instagram-парақшасында өзі мәлімдеді.
«Бүгінгі турнирде өкінішке қарай өнер көрсете алмайтын болдым. Барлығы дүние жүзін жаулап тұрған короновирусқа байланысты. Дубайға келген күннен бастап ентігу, дене қызуының көтеліруі, мұрынның бітуі, дәм сезбеу симптомдары пайда болды. Турнирге шығар алдында міндеттелген ПТР-тест оң нәтиже көрсетіп, мені қонақүй номерінде оқшаулады, салмақ өлшеу рәсіміне шығарылмауымның себебі осы болды!», — деген Жанқош Тұраров ештеңеге қарамастан жаттығу жасап жүргенін жазған: «Бірақ ештеңеге қарамастан номер ішінде де скакалка секіру, жүгіру арқылы жаттығуды тоқтатпай өз формамды ұстап, бекітілген салмаққа жетіп, оқшауланған күйде номер ішінде салмақ өлшеу рәсімін өткіздік. COVID-19-ға қайтадан ПТР тапсыруды өтіндік, өкінішке қарай бүгінгі нәтиже тағы да «оң» көрсетті. Айналама, қоршаған ортама деген жауапкершілікті сезіне отырып, коронавирустың тез жұқпалы екенін ескере отырып турнирден шектетілдім. Егер дәл осы диагноз болмағанда, қазіргі жағдайыммен-ақ маған 3 раунд та жеткілікті еді… Бірақ амал қанша, барлығы бір Аллахтың қалауы. Бүкіл әлемді дүрліктіріп тұрған мына дерттен аман болыңыздар! Ауырмаңыздар!», — деп қосты ол.
