2025 жылғы 21 шілдеде Жамбыл облысы бойынша ҚАЖ департаментіне қарасты №59 түзеу мекемесінде жүргізілген жедел іс-шаралар барысында сотталғанға келген сәлем-сауқатты тексеру кезінде қара түсті аяқ киімнің астынан өсімдік тектес, ерекше иісі бар, тыйым салынған затқа ұқсас екі орама табылды.
Аяқ киімді кездесуге келген азамат Е. алып келген. Оның айтуынша, аяқ киімді бұрын танымайтын ер адам өтініп берген, ішінде не бар екенін білмеген.
Аталған дерек бойынша материал тіркеліп, тергеу амалдары басталды. Іс Жамбыл облысы прокуратурасы мен басқа да тиісті органдарға хабарланды.
Сот-химиялық сараптама қорытындысы негізінде тәркіленген зат «гашиш» болып табылды, жалпы салмағы — 287,02 грамм. Аталған факт бойынша ҚР ҚК 297-бабы 1-бөлігімен қылмыстық іс қозғалды.
