Түркістанда дәмханада тапсырысты төлеуден бас тартып, жанжал шығарған адам бұрынғы депутат болып шықты, деп хабарлайды ҚазАқпарат.
Облыстық полиция департаментінің таратқан дерегіне сенсек, 17 қазан күні түнгі сағат 1.00 шамасында көңіл көтеру орнының қызметкерлері Түркістан полициясының 102 пультіне хабарласып, көмек сұраған. Бірден оқиға орнына полиция жасағы шықты. Келген бойда тәртіп сақшылары жергілікті тұрғын ер адамның төлем жасаудан бас тартып, жанжал шығарғанын анықтады.
Құқық бұзушы, яғни ер азаматқа қатысты ұсақ бұзақылық жайтымен әкімшілік іс қозғалды. Жиналған материалдар сотқа жіберіледі. Сондай-ақ ер адамның бұрын қалалық мәслихаттың депутаты болғаны және биылғы жылдың наурыз айында өкілеттігін тоқтатқаны анықталды.
