«21 министрліктің 11-і су ресурстарын басқару саласында тікелей өкілеттіктерге ие. Аталған 11 министрліктің қазіргі жағдайы мен құзыретіліктерінің бөлшектенуі су ресурстарын басқару саласындағы саясаттың жетілмегендігін, бірыңғай тәсілдердің жоқтығын көрсетіп отыр. Сонымен қатар, су ресурстары көрсеткіштерінің сәйкессіздігі мен бірыңғай деректер базасының жоқтығы да бөлек қарастырылуы тиіс. Су ресурстары және ирригация министрлігінің мәліметіне сәйкес, Қазақстанда 2030 жылға дейін су шаруашылығы құрылыстарын қалпына келтіру үшін кешенді жоспар әзірленген. Жоспар бойынша 57 жаңа су қоймасы, 133 гидротехникалық құрылыс, 7000 шақырым астам ирригациялық жүйелер және 1200 шақырым топтық су құбырларын қайта жаңарту, сондай-ақ 3600-ден астам ұңғымаларды бұрғылау көзделуде», — деді Жанболат Жөргенбаев.
Сенатор 1982-85 жылдары пайдалануға берілгенін Бартоғай су қоймасы, Д.Қонаев атындағы Үлкен Алматы каналы, Күрті, Қорам және Киікпай каналы 60%-ға тозғанын атап өтті. Суды басқарудың кіріктірілген үлгісіне көшу уақыт пен ресурстарды қажет етеді, бірақ су шаруашылығының тиімділігін едәуір арттыра алады.
Депутат осыған байланысты ҚР Жаңа Су кодексін әзірлеу аясында бірқатар мемлекеттік органдардың су ресурстарын пайдалану және қорғау саласындағы құзыретін қайта қарауды, су тұтынуға кешенді бағалау жүргізуді және су ресурстарын басқару стратегиясын әзірлеуді ұсынды.
