Атап айтар болсақ, Медицина қызметкерлері күні қарсаңында Шардара ауданының әкімі Арман Романұлы Қарсыбаев денсаулық сақтау саласының дамуына өлшеусіз үлес қосқан медицина саласының ардагерлерін арнайы қабылдады.
Сонымен қатар аудан басшысы Арман Романұлы — Денсаулық сақтау саласы – қоғамның ең маңызды салаларының бірі. Сіздер саналы ғұмырларыңызды халық денсаулығын қорғауға арнап, талай жанның өміріне араша болдыңыздар. Кәсіби біліктіліктеріңіз бен адал еңбектеріңіздің арқасында көптеген азаматтар сауығып, отбасыларына аман оралды. Сіздердің өмір жолдарыңыз бен еңбек тәжірибелеріңіз кейінгі буын дәрігерлер үшін үлкен өнеге. Ел игілігі жолындағы ерен еңбектеріңіз үшін шынайы алғысымды білдіремін, – деді.
Кездесуде медицина саласының ардагерлеріне «Еңбек ардагері» төсбелгісі тағылып, аудан әкімінің Құттықтау хаты табысталды. Сондай-ақ қазақы дәстүрге сай иықтарына шапан жабылып, құрмет көрсетілді.
Өз кезегінде медицина саласының ардагерлері көрсетілген сый-құрмет үшін ризашылықтарын білдіріп, медицина қызметкерлеріне жасалып жатқан қолдау мен ауданның әлеуметтік-экономикалық дамуына бағытталған жұмыстар үшін аудан басшысына алғыстарын жеткізді.
Тағылымы мол кездесуде ардагерлер өздерінің еңбек жолындағы естеліктерімен бөлісіп, ақ баталарын берді.
Қоғам денсаулығы жолында ұзақ жылдар бойы адал қызмет атқарған ардагерлерге көрсетілген бұл құрмет – олардың ел алдындағы ерен еңбегіне деген шынайы ризашылықтың белгісі.
Сондай-ақ, Төлеби аудандық Мәдениет үйінде Медицина қызметкерлерінің кәсіби мерекесіне орай салтанатты жиын өтті. Жиынға аудандық мәдениет және тілдерді дамыту, дене шынықтыру және спорт бөлімінің басшысы Әуесбек Әсілбек, аудандық мәслихат депутаты Ерболат Жабаев қатысып, сала мамандарын құттықтады.
Құттықтау сөзінде Әуесбек Әсілбек мемлекет тарапынан денсаулық сақтау саласын дамытуға ерекше көңіл бөлініп отырғанын атап өтіп, медицина қызметкерлерінің халық денсаулығын сақтау жолындағы ерен еңбегіне жоғары баға берді.
Мерекелік жиын барысында ауданның денсаулық сақтау саласының дамуына үлес қосып жүрген бірқатар медицина қызметкерлері аудан әкімінің және аудандық мәслихаттың «Алғыс хаттарымен» марапатталды.
Тағы бір айтары, Сарыағаш аудандық мәдениет үйінде ақ халатты абзал жандардың еңбегін ұлықтауға бағытталған мерекелік жиын өтіп, денсаулық сақтау саласы қызметкерлеріне ерекше құрмет көрсетіліп, олардың қоғам алдындағы өлшеусіз еңбегі жоғары бағаланды.
Мерекелік жиынға аудан әкімінің орынбасары Нұрполат Талипов, аудандық мәслихат төрағасы Рысбек Асылбекұлы, Сарыағаш ауданы бойынша шекара басқармасының бастығы Асқар Болатов, ауданның бас дәрігері Бекзат Сланов, денсаулық сақтау саласының қызметкерлері мен аудан тұрғындары қатысты.
Салтанатты іс- шарада сөз сөйлеген аудан әкімінің орынбасары Нұрполат Талипов медицина қызметкерлерін кәсіби мерекелерімен құттықтап, олардың халық денсаулығын сақтау жолындағы ерен еңбегіне жоғары баға берді.
– Әрбір мемлекеттің басты байлығы – оның азаматтары болса, адам үшін ең қымбат қазына – денсаулық. Осы орайда медицина қызметкерлерінің қоғамдағы орны әрдайым ерекше. Сіздер күн сайын адам өмірі мен денсаулығы үшін аянбай еңбек етіп, кәсіби шеберліктеріңіз бен тәжірибелеріңізді ел игілігі жолында жұмсап келесіздер. Аудан тұрғындары атынан денсаулық сақтау саласын дамытуға қосып отырған үлестеріңіз үшін шынайы алғысымды білдіремін, – деді ол.
Мерекелік жиын барысында аудан әкімінің орынбасары денсаулық сақтау саласында табысты еңбек етіп жүрген бірқатар қызметкерлерді Алғыс хаттармен марапаттап, бағалы сыйлықтар табыстады.
Сонымен қатар, аудандық мәслихат төрағасы Рысбек Асылбекұлы да медицина қызметкерлерін кәсіби мерекелерімен құттықтап, сала ардагерлері мен үздік мамандарды Алғыс хаттармен, арнайы құрмет төсбелгілерімен және бағалы сыйлықтармен марапаттады.
Салтанатты іс-шара мерекелік концерттік бағдарламамен жалғасын тапты. Аудандық мәдениет үйінің өнерпаздары ән мен күйден шашу шашып, көпшілікке көтеріңкі көңіл-күй сыйлады.
Фото: Егемен Қазақстан
