Жалпы алғанда Конго-Қырым геморрагиялық қызбасы (ҚҚГҚ) — аса қауіпті инфекциялар тобына жататын жіті вирусты ауру. Қоздырғышы — Bunyaviridae тұқымдасына жататын Nairovirus, ол қан кетумен сипатталатын ауыр қызбаны тудыра алады. Аурудың ауыр жағдайларында өлім-жітім деңгейі 30 пайызға дейін жетеді. Қоздырғыштың негізгі тасымалдаушылары — иксодты кенелер.
Кеңес барысында Түркістан облысының Санитариялық-эпидемиологиялық бақылау департаменті, Денсаулық сақтау басқармасы, Ветеринария басқармасы және өзге де жауапты мекемелердің басшылары баяндама жасап, өңірде жүргізіліп жатқан кешенді жұмыстардың нәтижелері мен алдағы міндеттерді талқылады.
Денсаулық сақтау басқармасының басшысы Асхан Байдуәлиевтің айтуынша, медицина ұйымдары аса қауіпті инфекцияларға, оның ішінде Конго-Қырым геморрагиялық қызбасына күдікті науқастарды дер кезінде анықтау, диагностикалау және емдеу бойынша толық дайындықта жұмыс жүргізіп жатыр. Өңірдің барлық медициналық ұйымдарында дәрігерлер мен орта буын медицина қызметкерлерінің кәсіби даярлығын арттыруға ерекше көңіл бөлінген. Биыл Конго-Қырым геморрагиялық қызбасы, сібір жарасы, оба және тырысқақ сияқты аса қауіпті инфекциялар бойынша жүздеген семинар ұйымдастырылып, медицина қызметкері оқытылды.
Денсаулық сақтау ұйымдарында қажетті дәрілік препараттар мен жеке қорғаныш құралдарының жеткілікті қоры жасақталған. Медициналық мекемелерде Конго-Қырым геморрагиялық қызбасын емдеуде қолданылатын «Рибавирин» препараты, қорғаныш киімдері, бетперделер, респираторлар, медициналық қолғаптар және антисептикалық құралдар жеткілікті көлемде сақталуда. Облыс бойынша жұқпалы ауруларға арналған төсек-орын қоры да толық дайындыққа келтірілген.
Үйлестіру кеңесінде Конго-Қырым геморрагиялық қызбасының алдын алуда медицина саласы ғана емес, ветеринария, санитариялық-эпидемиологиялық қызмет және жергілікті атқарушы органдардың өзара үйлесімді жұмысының маңызы ерекше екені атап өтілді. Осыған байланысты аудан, қала әкімдіктеріне елді мекендердегі санитарлық-ағарту жұмыстарын күшейту, қора-жайлар мен ауыл шаруашылығы жануарларын жоспарлы залалсыздандыруды сапалы ұйымдастыру, кенеге қарсы өңдеу жұмыстарының тиімділігіне тұрақты бақылау жүргізу тапсырылды. Сонымен қатар, шілде айынан бастап кенеге қарсы залалсыздандыру жұмыстарының екінші кезеңін уақтылы өткізу, ауыл шаруашылығы жануарларын толық қамту, арнайы тоғыту және бүрку алаңдарының жұмысын ұйымдастыру, дәрі-дәрмек пен қажетті материалдардың уақтылы жеткізілуін қамтамасыз ету міндеттері белгіленді.
Кеңес қорытындысында жауапты мекемелерге халық арасында түсіндіру жұмыстарын күшейту, медицина қызметкерлерінің кәсіби даярлығын тұрақты жетілдіру, күдікті жағдайларды ерте анықтау және зертханалық тексерулерді уақтылы жүргізу бағытындағы жұмыстарды жалғастыру тапсырылды.
Мамандар тұрғындарды табиғат аясында, мал қораларында немесе жайылымдық жерлерде болған кезде қауіпсіздік талаптарын сақтауға шақырады. Денеге кене жабысқан жағдайда оны өздігінен жаншып немесе жұлмай, мүмкіндігінше медициналық ұйымға жүгіну қажет. Ал дене қызуы көтеріліп, әлсіздік, бас ауруы немесе өзге де белгілер байқалған жағдайда уақыт оздырмай дәрігердің көмегіне жүгіну керек.
Жалпы жұқпалы аурулар туралы сөз қозғайтын болсақ, Денсаулық сақтау министрлігі: Қазақстанда туберкулезбен сырқаттанушылық 13,1%-ға, өлім 25%-ға төмендегенін айтады. Соңғы бес айдың қорытындысы бойынша Қазақстанда туберкулезге қатысты негізгі эпидемиологиялық көрсеткіштер бойынша тұрақты оң динамика сақталуда.
Осы кезеңде туберкулезбен сырқаттанушылық деңгейі 13,1%-ға төмендеп, 100 мың тұрғынға шаққанда 28,6 жағдайды құрады. Аурудың таралу көрсеткіші 14,0%-ға азайып, 100 мың тұрғынға шаққанда 37,0 жағдайға дейін төмендеді. Ал туберкулезден болатын өлім бірден 25,0%-ға қысқарып, 100 мың тұрғынға шаққанда 0,7 жағдайды құрады.
Оң динамика балалар арасында да байқалады. 0–17 жас аралығындағы балалар арасында туберкулезбен сырқаттанушылық 5,7%-ға төмендеді. Сонымен қатар, 2024 және 2025 жылдары елімізде балалардың арасында туберкулезден қайтыс болудың бірде-бір жағдайы тіркелген жоқ.
Фото: Bozyq.kz
