Олар – 23 дәрілерлік амбулатория, 25 фельдшерлік-акушерлік пункт, 7 медициналық пункт ауылдық елді мекендердің халқына медициналық көмек көрсетуін бастаған. Осы бағыттағы жұмыстар жалғасын тауып, былтыр 36 нысан құрылысы жүргізіліп, пайдалануға берілген. Атап айтқанда, «Түркістан қаласындағы балалар оңалту орталығы» және облыстың ауылды жерлерінде 8 дәрігерлік амбулатория, 5 фельдшерлік-акушерлік пункт, 22 медициналық пункт халыққа дәрігерлік қызмет көрсете бастады.
Түркістан облыстық денсаулық сақтау басқармасының басшысы Асхан Байдуәлиевтің айтуынша, биыл өңірде 4 ірі медициналық нысанның құрылысы жүргізілуде. Соның бірі – Сарыағаш қаласында 300 төсек-орынды заманауи көпбейінді ауруханасының іргетасы биыл ақпан айында облыс әкімі Нұралхан Көшеровтің қатысуымен қаланған болатын. Құрылысы қызу жүріп жатқан аурухана пайдалануға берілгенде тек Сарыағаш қаласының тұрғындарына ғана емес, Келес, Мақтаарал, Жетісай, Қазығұрт және Шардара аудандарының тұрғындарына да қызмет көрсететін болады. Аталған аудандарда 1 миллионнан астам халық тұрады.
Аса маңызды әлеуметтік нысан Мемлекет басшысы Қасым-Жомарт Тоқаевтың Түркістан облысына жұмыс сапары барысында берген тапсырмасы аясында жүзеге асырылуда. Жаңа медициналық кешен облыстың денсаулық сақтау жүйесін жаңа деңгейге көтеруге, тұрғындарға сапалы және қолжетімді медициналық қызмет көрсетуге бағытталған. Бұл – Түркістан облысының әлеуметтік инфрақұрылымын дамытудағы стратегиялық маңызды қадам. Құрылыстың басталуы жаңа жұмыс орындарын ашуға мүмкіндік беріп, білікті медициналық кадрларды тартуға жағдай жасайды.
300 төсек-орынға есептелген аурухана құрамында үш негізгі блок бар: хирургиялық блок – 50 төсек-орын (нейрохирургия, офтальмология, ЛОР және травматология бөлімшелері), терапиялық блок – 100 төсек-орын (неврология, инсульт орталығы, кардиология және интервенциялық кардиология бөлімшелері), перинаталдық блок – 150 төсек-орын (ана мен балаға арналған заманауи күтім, жүкті әйелдер патологиясы бөлімшесі). Медициналық кешен заманауи жоғары технологиялы құрал-жабдықтармен толық қамтамасыз етіледі.
Жаңа аурухана 10,4 гектар аумақта орналасады. Үш қабаттан тұратын ғимараттың жалпы ауданы 70 мың шаршы метрден асады. Жобаның жалпы құны – 74,5 млрд теңге. Құрылыстың аяқталуы 2027 жылдың желтоқсанында жоспарланған. Аталған жобаны іске асыру үшін Сарыағаш қаласынан 10,4 гектар жер телімі бөлінген. Жобаны мердігерлік атқаратын ұйым – «ASPAN HOLDINGS» ЖШС, техникалық қадағалаушы – «Строй-Проф» ЖШС, авторлық қадағалаушы – «Engineering center ltd» ЖШС.
Жоғарыда айтылған, салынып жатқан төртеудің ішіндегі ең ірісі – Түркістан қаласындағы 570 төсек-орындық көпбейінді аурухананың құрылысы. Түркістан қаласындағы 80 төсек-орындық Ана мен бала орталығының құрылысы, Ордабасы ауданының орталығы Темірлан ауылында 200 орындық облыстық перинаталдық орталық құрылысы жалғасуда. Сонымен қатар, тозығы жеткен медициналық нысандарды жаңғырту мақсатында 6 нысан күрделі жөндеу жұмыстарынан өткізілуде.
Ал, 3 нысанның күрделі жөндеу жұмыстары аяқталып, пайдалануға тапсырылды. Олар: Кентау қалалық орталық ауруханасы, Қазығұрт аудандық орталық ауруханасына қарасты «Қаратас» емханасы, Шардара аудандық орталық ауруханасына қарасты «Алатау батыр» ауылдық ауруханасы. 2026 жылға өтпелі 3 нысан – Сайрам аудандық орталық ауруханасы, Сайрам аудандық «Қарабұлақ» аудандық ауруханасы және Жетісай аудандық «Асықата» ауруханасында күрделі жөндеу жұмыстары жүргізіліп жатыр.
Жалпы алғанда бүгінде Түркістан облысында елді мекендерді, қалалар мен аудандарды әлеуметтік маңызы бар нысандармен, инфрақұрылыммен қамту жұмыстары қарқынды жүріп жатыр. Биыл өңірде 93 нысанның құрылысына бюджеттен 77,3 млрд теңге бөлінген. Жыл қорытындысында 58 нысанды пайдалануға беру жоспарланған. Қазіргі таңда олардың 7-еуі ел игілігіне тапсырылған.
– Әрбір нысан сапалы әрі уақтылы тапсырылуы керек. Құзырлы мекемелер, жауапты басшылар құрылысты басталған сәттен бастап қадағаласын. Халықтың салығы есебінен жасалып жатқан жұмыс талапқа сай болуы қажет. Егер бекітілген жоспарға сай жұмыс атқармаса және ғимаратты сапасыз салса, мердігермен келісімшартты үзіңіздер. Құрылыс материалының сапасы, жұмысшы саны, нысанның мерзімінде тапсырылуы қатаң бақылауда болатын болсын, – деген болатын бұл жөнінде облыс әкімі Нұралхан Көшеров.
Фото: 24KZ
