Депутаттың айтуынша, бастапқы капиталдың болмауы – кооперативтердің негізгі проблемасы болып отыр. Яғни, «әуелі несие алып, содан кейін кооперативке кіру» пайымдауы жұмыс істемейді. Депутат биыл «Ауыл аманаты» бағдарламасы аясында 400 ауыл шаруашылығы кооперативі құрылғанын айта келіп, олардың жұмыс істеуі үшін 100 миллиард теңге бөлінгеніне тоқталды. Сонымен қатар, «Аграрлық несие корпорациясы» 543 ауыл шаруашылығы кооперативіне тағы қосымша 370 миллиард теңге бөлді. Алайда, сенатордың айтуынша, елдегі 268 000 ферма мен 1,5 миллионнан астам жеке қосалқы шаруа қожалығы әлі күнге дейін ауылшаруашылық кооперативінің қызметіне қосылмай отыр.
«Осы аталған құрылымдар арасында ірілендіру бағытындағы жұмыстың әлсіз жүріп жатқанын көрсетуде. Біріншіден, насихаттау жұмысының жүргізілмеуі және «Ауыл аманаты» бағдарламасының мүмкіндіктері толық ашылмаған. Екінші, жер қатынастарын реттеудің кейбір мәселелері толық қарастырылмаған. Үшінші, кооператив пен оның мүшелері үшін салық салу мәселелері толық реттелмеген. Төртінші, кәсіпкерлік субъектілерінің өнімді сақтауға арналған қоймалардың жоқтығы, өңірлерде сауда-логистикалық орталықтардың шешілмегендігі, бұл да проблема болып табылады», — деп атап өтті депутат.
Сенатор осы айтылғандарды тұжырымдай отырып, еліміздің Үкіметіне бірқатар ұсыныстар айтты.
«Ауыл шаруашылығы кооперациясын дамыту жұмыстарын жүйелендіру үшін Үйлестіру кеңесі құрылуы тиіс. Осыған байланысты «Ауыл шаруашылығы кооперативтері туралы» заңына бірқатар өзгерістер енгізу маңызды. Сонымен қатар Салық заңнамасын жетілдіру аясында кооперативке және оның мүшелеріне қосарланған салық салуды алып тастауды қарастыру керек. Ауыл шаруашылығы кооперативтерінің көлік шығыстарын субсидиялау бойынша ұсыныстарды қарастыру маңызды», — деді сенатор.
