— Егер жер ресурсы нақты аумақта пайдаланылса, жалпы инфрақұрылымға салмақ түсетін дәл осы аудан болса, онда неге өтемақы төлемі толық көлемде республикалық деңгейге кетеді? Президент «Түскен табыс, ең алдымен, сол аймақты дамытуға жұмсалуы керек» деп нақты айтты. Бұл қағидатты жер қатынастары саласында да толық көлемде іске асыру қажет деп есептейміз. Жер кодексінің 105-бабына сәйкес, ауыл шаруашылығын жүргізуге байланысты емес мақсаттарға пайдалану үшiн ауыл шаруашылығы алқаптарын алып қоюдан туындаған шығыстар ауыл шаруашылығы өндiрiсiнiң деңгейiн сақтау мақсатында бюджет кiрiсiне өтелуге тиіс, — дейді Ауыл партиясы фракциясының депутаттары.
Ақтөбе облысы Қарғалы ауданының мысалы соның айғағы. Жел электр станциясын салу жөніндегі инвестициялық жобаны іске асыру барысында ауыл шаруашылығы мақсатындағы жерлер берілген болатын. Ауыл шаруашылығы өндірісінің шығындарын өтеу нәтижесінде 45 миллион теңге республикалық бюджетке түскен.
Еліміздің қаржы министріне депутаттық сауал жолдаған «Ауыл» партиясының фракциясы мұндай тәсілді қайта қарау керек деп есептейді. Сондықтан Қаржы министрінің № 152 бұйрығына тиісті өзгерістер енгізу мүмкіндігін қарастыру және мұндай түсімдерді тиісті өңірдің немесе ауданның бюджетіне жіберуді ұсынады. Бұл қаражат жерді қалпына келтіруге, жергілікті инфрақұрылымды дамытуға, ауыл аумақтарын дамытуға және әлеуметтік маңызы бар жобаларды іске асыруға жұмсалуы тиіс.
Фото: BAQ.KZ
