Депутаттың айтуынша, қазақстандық дәрі-дәрмек пен медициналық бұйымдарды өндірушілер жыл сайын бағаны тіркеу немесе бекітілген бағаны мемлекеттік сараптама ұйымында қайта тіркеу рәсімдерінен өтуге мәжбүр болып отыр.
«Өнім өндірушілер өткен жылдардағы шекті бағаға қанағаттанғанына қарамастан барлық қажетті құжаттарды жинау, уақыт жоғалту, қаржы және т.б. түріндегі көптеген қиындықтармен бағаны қайта тіркеу рәсімдерінен жыл сайын өтуге мәжбүр. Бұл ретте «Халық денсаулығы және денсаулық сақтау жүйесі туралы» кодексте шекті бағаларды жыл сайын бекіту міндеті жоқ. Нәтижесінде 2021 жылдан бастап баға жөніндегі тиісті бұйрықтар еш жаңартылмаған»,- деді сенатор.
Сенатор осыған байланысты Үкімет басшысы Әлихан Смайыловтан Денсаулық сақтау министрлігіне және тиісті мекемелерге бағаны жыл сайынғы міндетті түрде тіркеуді немесе тіркелген бағаны қайта тіркеуді алып тастау мәселесін қарауды тапсыруды сұрады.
«ҚР Денсаулық сақтау министрі жаңа бұйрық қабылдауды жеделдетуі не қолданыстағы бұйрықтарына өзгерістер мен толықтырулар енгізуі тиіс. Өйткені өнім өндірушілер осы уақытқа дейін бірқатар тауарлардың бағасы бекітілмегендіктен мемлекеттік тапсырыс бойынша өнімді сата алмай отыр. Жоғарыда аталған мәселелер мен бизнестің оларды шешу жөніндегі ұсыныстары көптеген орындарда және Үкіметте талқыланғанын, соның негізінде тиісті хаттамалық тапсырмалар берілгенін атап өткім келеді. Алайда, бүгінгі күнге дейін ештеңе өзгерген жоқ»,- деді депутат Асанова.
