Аталған үш жоба да Қызыләуіт ауылдық округінде бұдан бұрын салынған екі жел стансасы қасынан бой көтеруде. Таратып айтсақ, «Шенгелді» ЖШС жалпы қуаты 4,5 мегаватты құрайтын үшінші жел электр стансасының құрылысын 2020 жылы бастаған. Оның жобалық құны 1 млрд 829,1 млн теңгені құрайды.
Қазіргі таңда 4,5 МВт-ты құрайтын 3 қондырғы орнатылған. Оның құрылыс жұмысына 11 адам тартылған. Нысанды мердігер осы жылдың соңына қарай тапсырып, іске қосуды жоспарлап отыр.
Үшінші жел электр стансасының құрылысын «Шенгелді-2» ЖШС мойнына алған. Мұнда да 3 қондырғы орнатылып, нысанды іске қосуға дайындауда.
Бұл жобалардың құрылтайшы директоры Жолдыбек Тұралиевтің айтуынша, стансадағы құрал-жабдықтар Даниядан әкеліп орнатылды. «Бүгінгі таңда 7 станса қондырғысы қойылды. Енді 9 қондырғы орнатылуда. Қыркүйек айында әрбір мердігер өз қондырғыларын іске қоспақ. Қазіргі таңда электр қуатын жинайтын үлкен электр стансасының құрылысы жүруде. Оның ені мен ұзындығы 10 м. Жалпы Талас ауданында пайдалануға берілген 2 жел стансасы мен соғылып жатқан 3 станса да бізге қарайды, тек олардың мердігерлері бөлек. Алдағы уақытта қондырғылар санын арттырып, оны 30 МВт-қа дейін жеткізуді көздеп отырмыз», — дейді жоба құрылтайшысы.
Бұл жобалар ауданның экономикалық және әлеуметтік ақуалын арттырады деп санайды аудан әкімдігі кәсіпкерлік, өнеркәсіп және туризм бөлімінің басшысы Ауданбек Тауасаров.
