Жамбыл ауданына қарасты Қызылтаң ауылы маңында «Айша күн шуақ» стансасы соғылды. Онда 50 МВт электр қуаты өндірілуде, стансада 15 адам жұмыс істейді.
Бүгінгі таңда республикада өндірілетін электр қуатының 21%-ы біздің облысқа тиесілі. Жуалы ауданындағы «Бурное соллар» күн электр стансаларынан кейінгі үлкен күн электр стансасы «Айша күн шуақ» стансасы. Облысымызда күннен, желден және судан энергия өндіретін 327,6 мегаваттық 17 станса жұмыс істеуде. Оның 5-еуі күн, 6-ы су, 6-ы жел электр стансалары. 2021-2030 жылдар аралығында электр қуатын өндіретін стансалар саны 32 нысанға жеткізіп, 1251 электр энергиясын өндіру жоспарлануда.
Құрылыс жұмысы өткен жылы басталып, жақында ғана пайдалануға берілген күн электр стансасының құрылысын Украиналық «Родина» ЖШС жүргізген болатын. 110 гектар аумақты алып жатқан стансаға 100 мың күн панелі орналастырылған. Треккерлер жүйесі арқылы панелдер күн шығыуына қарай қозғалып отырады. Бұл панелдердің бір артықшылығы екі жағынан да жұмыс істейді. Мәселен, қыс ауасында жерге түскен қардың күнге шағылысқан сәулесі арқылы да панел энергия қабылдауға қауқарлы. Бұл панелдер Ресей мен Қытайда шығарылған.
-Бұл күн электр стансасының өзге стансалардан артықшылығы қозғалмалығында. Ондағы панелдер күн сәулесінен көп энергия жинап қана қоймай, күн көзінің бағытына қарай қозғалып, сәулені көбірек тартуға тырысады. Сонымен бірге қатты желге де төтеп бере алады. Биылғы ақпан айында облысымызда орын алған қатты дауыл кезінде бұл панелдер өзінің төзімділігі мен ыңғайлылығын дәлелдеді. Бұл панелдер 40-50 км/сағат жылдамдықпен соғатын дауылға төтеп беретіндей етіп есептелген. Қатты желде панелдер нөлдік деңгейге автоматты түрде қосылып, зақымданудан сақталады. Сол үшін оны үнемі бақылап отырамыз. Осылайша уақыт талабына сай автоматтандырылған жаңа күн электр стансасы қарапайымдылығымен де ерекшеленеді, – дейді Жандос Райбекұлы.
