Адамдардың баға жетпес байлығы – денсаулығын, өмір сапасын жақсарту жолында мемлекет тарапынан атқарылып жатқан жұмыстар ұшан-теңіз.
Президент Қасым-Жомарт Тоқаев денсаулық сақтау саласын дамытуды басым бағыттардың бірі ретінде белгілеп, халыққа арнаған Жолдауларында нақты талаптар қойып отыр. Соңы жылдары Қазақстан медицинасы қай жағынан болсын дамып, өрлеу, өркендеу кезеңіне бет алды.
Соның бір дәлелі, өткен аптада Түркістан облысының әкімі Нұралхан Көшеров Жетісай ауданына жұмыс сапары барысында Асықата кентінде жаңадан бой көтерген «Aksu Samruk Medical Clinic» медициналық орталығының ашылу рәсіміне қатысып, тұрғындарды маңызды әлеуметтік нысанның іске қосылуымен құттықтады.
Өңір басшысы өз сөзінде адам өмірі мен денсаулығы мемлекеттің ең жоғары құндылықтарының бірі екенін атап өтіп, Мемлекет басшысы Қасым-Жомарт Тоқаевтың тапсырмасына сәйкес денсаулық сақтау саласын дамыту, медициналық көмектің сапасы мен қолжетімділігін арттыру бағытында Түркістан облысында жүйелі жұмыстар жүргізіліп жатқанын айтты.
– Бүгін өңіріміз тағы бір маңызды әлеуметтік нысанмен толықты. Денсаулық сақтау саласына салынған әрбір инвестиция – ел болашағына салынған инвестиция. Сондықтан жаңа медициналық орталықтардың ашылуы тұрғындардың өмір сүру сапасын жақсартып, ана мен бала денсаулығын нығайтуға, халыққа сапалы әрі қолжетімді медициналық қызмет көрсетуге мүмкіндік береді. Өңірде өндіріс орындарын ғана емес, әлеуметтік нысандарды да көбейту – басты міндеттердің бірі, – деді Нұралхан Көшеров.
Облыс әкімі Түркістан облысы құрылғаннан бері денсаулық сақтау саласында ауқымды жұмыстар атқарылғанын атап өтті. Егер 1991-2017 жылдары өңірде 386 денсаулық сақтау нысаны салынса, соңғы сегіз жылда облыста 214 жаңа медициналық нысан пайдалануға берілген.
Жергілікті кәсіпкер Елдос Байыспаевтың жеке инвестициясы есебінен 2 млрд теңгеге салынған медициналық орталық заманауи құрал-жабдықтармен қамтамасыз етілген. Мұнда тәулігіне 280 адамға дейін қызмет көрсетіледі. 10 орындық күндізгі және 40 орындық тәуліктік стационар жұмыс істейді. Жоба аясында 70 жаңа жұмыс орны ашылды.
2024 жылдың мамыр айында басталған құрылыс нәтижесінде бой көтерген, жалпы аумағы 2565 шаршы метрді құрайтын орталықта терапевт, кардиолог, хирург, травматолог, лор, эндокринолог, невропатолог, гастроэнтеролог, дерматолог, офтальмолог, стоматолог, гинеколог, уролог, педиатр және басқа да бағыттағы жоғары білікті мамандар қызмет көрсетеді.
Сонымен қатар орталықта күрделі операциялар жасауға мүмкіндік қарастырылған. Балалар мен ересектерге арналған вакцина бөлмелері, зертханалар, мүмкіндігі шектеулі азаматтарға арналған лифт, заманауи жедел жәрдем көліктері жұмыс істейді.
Осының алдында ғана Жетісай ауданының әкімі Серік Үсенұлы Жылы су ауылдық округіне арнайы барып, ондағы шипажайлардың қызметін көрді. Жүргізіліп жатқан құрылыс және қайта жаңғырту жұмыстарының барысымен танысқан болатын.
Сапар барысында аудан басшысы тарапынан демалушылар мен ем қабылдаушыларға қолайлы жағдай жасау мақсатында жүзеге асырылып жатқан жобалардың барысы, шипажай аумақтарындағы инфрақұрылымды жақсарту, ғимараттарды заманауи талаптарға сай жаңарту және қызмет көрсету сапасын арттыру бағытында атқарылып жатқан жұмыстар зерделенді.
Сонымен қатар, емдік-сауықтыру қызметтерінің ұйымдастырылуы, келушілерге ұсынылатын медициналық және профилактикалық шаралардың сапасы назарға алынды. Мекеме басшылары мен округ әкімі атқарылып жатқан жұмыстар жөнінде баяндап, алдағы жоспарларымен бөлісті.
Аудан әкімі туристік және емдік-сауықтыру әлеуетін дамыту өңір экономикасына оң серпін беретінін атап өтіп, нысандардағы құрылыс жұмыстарының сапалы әрі белгіленген мерзімде аяқталуы маңызды екенін жеткізді. Сондай-ақ, келушілер үшін қауіпсіз әрі жайлы орта қалыптастыру бағытындағы жұмыстарды жүйелі түрде жалғастыруды тапсырды.
«Жылы су ауылдық округіндегі шипажайларды дамыту тұрғындардың денсаулығын нығайтуға ғана емес, ішкі туризмді дамытуға, жаңа жұмыс орындарын ашуға және өңірдің инвестициялық тартымдылығын арттыруға мүмкіндік береді» деді аудан әкімі Серік Үсенұлы Мамытов.
Фото: Жетісай Ауданы Әкімдігі
