Атап айтар болсақ, 2025-2027 жылдарға арналған аудандық бюджетке өзгерістер енгізу, сондай-ақ әлеуметтік көмек көрсету қағидаларына өзгеріс енгізу туралы шешімдер қабылданды. Бұл мәселелер бойынша баяндамалар Сауран аудандық экономика және қаржы бөлімінің басшысы Ильяс Сұлтанғалиұлы Мырзахметов және жұмыспен қамту және әлеуметтік бағдарламалар бөлімінің басшысы Дәуірхан Асылбек тарапынан ұсынылды.
Сессия барысында қаралған барлық мәселелер депутаттар тарапынан қолдау тауып, тиісті шешімдер қабылданды.
Жалпы алғанда нарықтық қатынастардың құрылымында да, мемлекет тарапынан оларды реттеу механизмінде де бюджет қаржысы зор рөл атқарды. Қаржы – нарықтық қатынастардың құрамды бөлігі және мемлекеттік саясатты жүзеге асырудың құралы. Бұл орайда қаржының әлеуметтік-экономикалық мәнін түсіне білудің, оның іс-әрекет етуінің ерекшеліктерін терең ұғынудың, Қазақстан экономикасын ойдағыдай дамыту мақсатымен қаржы ресурстарын неғұрлым толық және ұтымды пайдаланудың әдістері мен амалдарын көре білудің маңызы зор.
Бұл орайда Сауран ауданында бюджет қаржысына бірнеше әлеуметтік нысандар салынып жатқанын айта кетуге болады.
Жақында аудан әкімі Мақсат Таңғатаров жұмыс сапарымен Бабайқорған ауылдық округіне барып, бюджет қаржысына салынып жатқан әлеуметтік маңызы бар нысандардың құрылысымен танысты. Алдымен Бабайқорған ауылында бой көтеріп жатқан мәдени клуб және кітапхана ғимаратының құрылысын аралады. Жоба бойынша нысанның жалпы ауданы 860,7 шаршы метрді құрайды. Нысан 2025 жылдың қыркүйек айында пайдалануға беріледі деп жоспарланған. Құрылысты «DAT Construction» ЖШС жүзеге асыруда. Қазіргі таңда нысанда ішкі қабырғалар қаланып, қабырға әрлеу жұмыстары жүргізілуде.
Сонымен қатар, аудан әкімі Абай елді мекенінде орналасқан 300 орындық мектеп құрылысымен танысты. Нысан құрылысының жалпы ауданы – 2 676,82 шаршы метр. Мектеп ғимаратының құрылысы 2025 жылы басталып, 2026 жылдың тамызында аяқталады деп көзделген. Аудан әкімі нысандарды аралау барысында құрылыс сапасына, жұмыс кестесінің сақталуына және мердігерлердің жауапкершілігіне ерекше назар аударды. Сондай-ақ, жауапты тұлғаларға құрылысты белгіленген мерзімде және сапалы түрде аяқтауды тапсырды.
Сауран ауданының әкімі Мақсат Таңғатаров Жүйнек ауылдық округіне жұмыс сапарымен барып, елді мекендердегі жолдарды орташа жөндеу және пайдалануға берілген көпір құрылысымен танысты.
Жүйнек ауылында жалпы ұзындығы 11,15 шақырымды құрайтын жолдарға орташа жөндеу жұмыстары жүргізілуде. Асфальт жабындысының қалыңдығы 5 сантиметр. Жөндеу жұмыстарын «Жайлау Агро» ЖШС жүргізіп жатыр. Жоба қыркүйек айының соңына дейін толық аяқталады деп жоспарланған.
Сонымен қатар, Шекербұлақ елді мекеніндегі Балантас көшесінен Түркістан көшелеріне өтетін учаскеде орналасқан көпір ағымдағы жөндеуден өтті. Ұзындығы 14 метр, ені 4 метр болатын бұл көпірдің астына бетон блоктар орнатылды. Жөндеу жұмыстарын «Kaz Construction» ЖШС жүргізді.
Аудан әкімі аталған инфрақұрылым нысандарын аралау барысында жұмыс сапасы мен мерзімінде аяқталуын басты назарға алып, мердігер мекемелер мен тиісті сала басшыларына нақты тапсырмалар берді.
– Ауылдық елді мекендердің жол және көлік инфрақұрылымын жаңарту — тұрғындардың өмір сүру сапасын жақсартудың маңызды тетігі. Бұл жұмыстар бюджет қаржысына атқарылып жатқандықтан әрбір құрылыс халықтың күнделікті игілігі үшін жұмыс істеуі керек, — деді аудан әкімі Мақсат Таңғатаров.
Фото: Егемен Қазақстан
