Депутаттың айтуынша, бағдарламаның негізгі мақсаты – ауыл тұрғындарының табысын арттыру және аграрлық салада кәсіпкерлікті дамыту. Оны іске асыруға 100 млрд. теңге бөлініп, несиелер 5 жылға дейін 2,5%-бен, ал мал шаруашылығын жүргізуге 7 жылға дейін берілді. Бірінші жылы бағдарлама жақсы нәтиже көрсетті: 15,5 мың жұмыс орны ашылды, 67,8 млрд теңге сомасына 1,2 млн тонна ауыл шаруашылығы өнімі өндірілді. Өңірлерде 4000-ға жуық кооператив құрылды. Айналма қаржымен несиелеу тетігінің арқасында 7 млрд теңгеге қосымша 1 мыңнан аса микронесие берілді. Бағдарламаға қатысушылар 1,2 млрд теңге салық төледі.
Алайда, соңғы екі жыл ішінде ауыл тұрғындары бағдарламаны қаржыландыруда қиындықтарға тап болуда.
«2024 жылы «Ауыл аманаты» бағдарламасын іске асыруға 100 млрд теңге көзделіп, 18,2 мың жұмыс орнын құру жоспарланған болатын. Алайда, бар болғаны 20 млрд. теңге қаралып, елді елеңдетумен шектелді. Биылғы жылы 50 млрд теңге қарастырылатыны тағы да хабарланды. Бірақ бүгінге қаражат мүлдем берілген жоқ, бұл тиімді бағдарламаның орындалуына кері әсерін тигізді. Жоғарыдағы айтылғандарды ескере отырып, Мемлекет басшысының тапсырмасын орындау мақсатында Үкімет тарапынан осы бағдарламаға қажетті қаражатты бөлуді және тиісті орталық мемлекеттік органдардың жауапкершілігін қарауды, ауылға деген аманатты орындауға ықпал етуді сұраймыз», — деді Сәкен Арубаев.
Фото: Ойыл газеті
