Бүгінгі күні Жамбыл облысында өндірістік жарақаттануды азайту мақсатында «Vision Zero» концепциясын 24, ал, «Халықтық бақылау» жобасын 15 кәсіпорын енгізді. Және тағы бір айтары, 941 өндірістік кеңес құрылып, 1333 техникалық инспектор жұмыс істеуде. Ал, 2024–2026 жылдарға арналған «Қауіпсіз еңбек» бағдарламасы қабылданды.
2025 жылдың «Жұмысшы мамандықтары жылы» деп жариялануына орай облыстық прокуратурамен бірлесіп «Қауіпсіз еңбек» жобасы бекітілді. Ірі кәсіпорындарға Көмек QR кодтары орнатылып, еңбек құқықтары бұзылған жағдайда жұмысшыларға көмекке жүгіну мүмкіндігі қарастырылды.
Сонымен қатар бекітілген кесте бойынша 1284 адамның қатысуымен 97 ұжымда түсіндіру жұмыстары жүргізілді. Жыл басынан 42 азаматқа кеңес берілді, БАҚ пен әлеуметтік желілерде 112 мақала жарияланды. Және 31 кәсіпорында 58 жұмыс орны аттестаттаудан өтті.
Жұмыскерлерді еңбек міндеттерін атқарған кезде жазатайым оқиғалардан сақтандыру бойынша айтатын болсақ, 2025 жылғы 1 шілдедегі жағдай бойынша жұмыскерлерді еңбек міндеттерін атқарған кезде жазатайым оқиғалардан сақтандыру бойынша жұмыс істеп тұрған 3178 белсенді кәсіпорындардың 2056-да сақтандыру жасалып, 64,6 пайыз құрап отыр.
Аталған көрсеткіш Еңбек және халықты әлеуметтік қорғау министрлігінің мақсатты индикаторларының бірі ретінде айқындалып, оны жыл соңына дейін 63 пайызға жеткізу жоспарланған болатын.
Осыған байланысты, қызметкерлерді сақтандыру шарттарын жасасқан кәсіпорындар үлесінің өсу қарқынын сақтау мақсатында сақтандыру шарттары жасалмаған ұйымдар бойынша дерекқор нақтыланды. Әлеуметтік сақтандыру қоры және сақтандыру компанияларымен тығыз байланыс орнатылды.
Мемлекеттік еңбек инспекторлары жергілікті атқарушы органдар, сақтандыру компаниялармен бірлесіп, кәсіпорындарда қолданыстағы заңнама талаптарына сәйкес түсіндіру жұмыстарын жүргізуде. Сондай-ақ БАҚ-да тиісті ақпараттар кеңінен жариялануда.
Сонымен бірге ұйым басшылары қолданыстағы заңнамаға сәйкес жауапкершілік туралы хабардар етілді.
Иә, өндіріс орындарында қауіпсіздікті сақтау қанша жерден барынша қадағаланғанымен, мұны құнттамай, опық жеп қалатын оқыс оқиғалардың азайып келе жатқаны рас. Бірақ арқаны әлі де кеңге салуға болмайды. Жалпы алғанда өндірістік жарақаттанудың себептері толығымен жұмыс орнында және жалпы кәсіпорында еңбекті ұйымдастыру деңгейіне байланысты. Өндірістік жарақаттанудың себептері: технологиялық процестердің жетілмегендігі, жабдықтардың, ғимараттар мен құрылыстардың, ұжымдық және жеке қорғаныс құралдары мен құралдарының конструктивтік кемшіліктері мен техникалық жай-күйі, ауыр жұмыстарды механикаландырудың жеткіліксіздігі, оның ішінде қоршаулардың, сақтандырғыш құрылғылардың, дабыл беру және бұғаттау құралдарының жетілмегендігі. Сонымен қатар материалдардың беріктік ақауларының және конструкциялардың тозуының болуы; пайдаланылатын заттардың бұрын белгісіз қауіпті қасиеттері әсер етеді.
Жамбыл облысының кәсіпорындарында жарақаттануды азайту бойынша қабылданып жатқан шаралар туралы айтатын болсақ, 2025 жылдың 6 айында қызметтік міндеттерін атқару барысында орын алған 20 жазатайым оқиғадан 24 адам зардап шексе, 4 адам қаза тапты. Ал, 2024 жылы – 25 жазатайым оқиға орын алып, 28 адам зардап шегіп, 4 адам қаза болған еді.
2024 жылдың сәйкес кезеңімен салыстырғанда, жазатайым оқиғалар саны 25 пайызға, яғни, 5 оқиғаға, ал зардап шеккендер саны 16,6 пайызға, яғни, 4 адамға азайып, қайтыс болғандар саны өзгеріссіз қалды. Атап айтар болсақ, 2024 жылы да 4 адам қаза болған еді. Орын алған жазатайым оқиғаларда 7 адам 3 топтық жазатайым оқиғадан зардап шекті.
Жалпы алғанда жұмыс берушілерге орын алған жазатайым оқиғалардың себептерін жою және алдын алу жөніндегі шаралар белгіленіп, олардың орындалуы тиісті мекемелермен қатаң бақылауға алынған.
Фото: ortcom.kz
