«Жасыл ел» еңбек жасағының Жуалы аудандық бөлімшесі де өңірдің экологиялық тазалық айлықтарына өз үлестерін қосып келеді. Жастар ресурстық орталығының директоры Мейіржан Төлеуішовтың айтуынша, бүгінгі таңда «Жасыл ел» еңбек жасағына тартылған жастар күшімен 1 маусымда 9 т қоқыс шығарылып, 4,5 га алаң тазартылған. Ал тал-дарақ отырғызуға 22 жас қатысып, 1169 түп ағаш көшеттері саябақтар мен аллеяларға отырғызылған. Жастар ол ағаштарды өз күтіміне алып, араға апта салып суарып тұруды әдетке айналдырып та үлгерген.
Бұдан бөлек, аудан орталығы Б.Момышұлы ауылында еңбек жасағы Е.Сауранбек, Жамбыл, Абылайхан, Жамбыл және Д.Қонаев көшелері бойында, Боранды, Ақсай, Ынтымақ, Н.Тұрысов көшесінің сай беткейлері мен «Жастар ресурстық орталығы мекемесінің» ауласында сенбілік ұйымдастырып, 1 га алаңды тазартып, 2,5 т қоқыс шығарған.
Өзге ауылдық округтерге тоқталар болсақ, Шақпақ ауылдық округінде Д.Пахомов көшесі бойында орналасқан саябақ пен әкімдік ғимараты ауласына барлығы 12 түп арша, 62 түп жеміс ағаштарының көшеті отырғызылған. Еңбек жасағы күшімен көшелер мен өзен-көлдер бойына сенбіліктер ұйымдастырылып, 2,5 т қоқыс шығарылыпты. Ал Қарасаз ауылдық округінде 2 тонна қоқыс шығарылып, округ әкімдігі ауласына 80 түп шырша көшеті отырғызылып, күтімге алынған.
Екінші маусымында жастар күшімен 6,5 т қоқыс шығарылып, 3 га алаң ретке келтірілген. Атап айтсақ, жастар «Мәңгілік ел аллеясы» ретке келтірді. Күйік асуында орналасқан «Жуалы» жазуын қалпына келтіріп, ақтаған. Шақпақата ауылындағы «Шақпақ әулие» киелі орында «Табиғат және біз» атты экологиялық акциясы өткізілді.
3 маусымда аудандағы экологиялық ақуалды жақсарту мақсатында сенбіліктер ұйымдастырып, өзен-көлдердің жағасында тазалық жұмыстарын жүргізді. Мәселен, 2 шілде күні «Жастар ресурстық орталығы» мекемесі қызметкерлері мен «Жасыл ел» жасақтары мүшелері аудандық «Бірге – Таза Қазақстан» атты экологиялық акциясы аясында сенбілік жұмыстарына ат салысты. Аталған акция барысында жастар «Теріс Ащы-бұлақ» су қоймасы маңында тазалық жұмыстарын жүргізді. Жалпы көлемі 2 га аумақ тазаланып, 1 т қоқыс жинаған.
