— Балаға тәлімді тәрбие мен лайықты білім беруде баршамыздың ұстанымымыз бір, мүддеміз ортақ. Сәт сайын өзгеріп, көз ілеспес жылдамдықпен дамуға бет алған бүгінгідей дәуірде рухани құндылықтар мен ұлттық тәрбиенің өзегінен ажырап қалмауға тиіспіз, — дейді бұл жөнінде Жамбыл облыстық білім басқармасының басшысы Рауан Садырқұлов.
2023-2024 оқу жылынан бастап тәрбие жұмысы барлық білім беру ұйымдарында Қазақстан Республикасы Оқу-ағарту министрінің бұйрығымен бекітілген «Біртұтас тәрбие» бағдарламасы негізінде жүзеге асырылуда. Бағдарлама жалпыадамзаттық және ұлттық құндылықтар негізінде адал азаматты тәрбиелеуді көздейді. Білім беру ұйымдарының барлық тәрбие жұмысының мазмұнында ұлттық мүдде, ар-ұят, талап тәрбие құндылықтары арқылы жүзеге асырылуда.
Білім беру ұйымдарында білім алушыларды тәрбиелеу ісі: оқу пәндерінің мазмұны; сынып сағаттары мен тәрбиелік іс-шаралар; сыныптан тыс іс-әрекеттер мен қосымша білім беру (үйірмелер, клубтар, секциялар, факультативтер және т.б.) арқылы жүзеге асырылады.
— Ағымдағы жылы ата-аналармен жұмыстарды күшейту, ата-аналар комитетінің, әкелер кеңесінің беделін арттыру, ата-аналар институтын құру мақсатында ҚР Оқу-ағарту министірінің бастамасымен облыста білім беру қызметкерлері мен ата-аналардың, мемлекеттік мүдделі органдардың өкілдерінің қатысуымен «Біртұтас тәрбие бағдарламасы: құндылықтар және оны іске асыру жолдары» атты бірлескен кең ауқымды кездесу өткізілді, — дейді Жамбыл облыстық білім басқармасының басшысы Рауан Садырқұлов. — Кездесуде бала тәрбиесі, отбасылық, рухани құндылықтар мәселесімен қатар жасөспірімдер арасындағы құмар ойындардың, өз-өзіне қол жұмсаудың, құқық бұзушылық пен топтық төбелестің, буллинг, кибербуллингтің, интернетке тәуелділіктің алдын-алу мәселелері қаралды.
Облыстағы барлық білім беру ұйымдарында мектеп және ата-ананың жауапкершілігін күшейтуді көздейтін мектеп пен ата-ананың өзара іс-қимылының жаңа «Оқушы — мектеп — ата-ана» өзара ықпалдастығымен жұмыстар жасалуда. Ата-аналарға кеңес қызметін әдістемелік қамтамасыз ету мақсатында «Отбасы – мектеп», «Мектеп өмірінің бір күні» атты жобалары енгізілген. Рухани – адамгершілік тәрбие беру, ұлттық тәрбие құндылықтарын дамыту бағытында «Ата-аналар комитеті», «Әжелер мектебі», «Әкелер кеңесі» бастамаларымен жұмыстар жүргізілуде.
Осы мақсатта білім беру ұйымдарында өткен оқу жылында ата-әжелер, әке-аналардың қатысуымен 400-ден аса іс-шара өткізіліп, оған 20 мыңға жуық оқушы қатысқан. Ардагер ұстаздар мектептің оқу-тәрбие жұмысына белсене араласып, ұрпақтар сабақтастығы негізінде жас ұстаздарға, оқушылар мен ата-аналарға ақыл-кеңестерін беріп, тәжірибелерімен бөлісіп, тағылымды тәрбиелік іс-шараларға қатысуы дәстүрге айналған.
Сонымен қатар, бүгінгі таңда мектептерде оқушыларға ұлттық тәрбие беру жұмысы үздіксіз жүргізілуде.
Атап айтсақ, биылғы оқу жылында жоспар бойынша 308 мектепте «Ата-салтын ардақтайық» тақырыбында театрандырылған қойылым, 377 мектепте «қазақтың ұлттық тағамы ақ бауырсақ» мерекесі, 413 мектепте «Этно-fashion» тақырыбында ұлттық киімдер флешмобы, 315 мектепте «Қазағымның қазынасы-домбыра» тақырыбында домбыра пати өтті.
Бұдан бөлек, 28908 білім алушының қатысуымен мақал-мәтелдер, жұмбақтар мен жаңылтпаштар сайысы, 22558 білім алушының қатысуымен қазақ эпостары мен жырлары үзінділерінен мәнерлеп оқу, 63616 білім алушының қатысуымен ұлттық спорт ойын түрлерінен жарыстар ұйымдастырылды.
Сондай-ақ, наурыз айында қыздар тәрбиесіне байланысты жоғары сыныптағы оқушы қыздары арасында «Бұрымды қыз» облыстық байқауы, 26 сәуірінде Қордай ауданында тәрбие саласына жауапты мамандарына арналған «Ұлттық құндылықтар-сапалы білім, саналы ұрпақ, салауатты келешек» атты облыстық семинар-практикум ұйымдастырылды.
Фото: zhalagash-zharshysy,kz
