Операцияны Жамбыл облысы Полиция департаментінің Есірткі қылмысына қарсы іс-қимыл басқармасының қызметкерлері арнайы бөлініс қызметкерлерімен бірлесіп, 2023-2025 жылдарға арналған есірткі бизнесіне және нашақорлыққа қарсы күрестің кешенді жоспары шеңберінде жүргізді.
Полицейлер Байзақ ауданында «Қасқа байтал» жайылымында 36 жастағы жергілікті тұрғынның басқаруындағы «Камаз» маркалы жүк көлігін тоқтатты.
Жүргізушіден бөлек, көлікте Жуалы ауданының 44 жастағы тұрғыны болған, ол жергілікті шаруа қожалығында малшы болып жұмыс жасаған. Жауап алу кезінде ол марихуана дайындауға бел буғанын және осы мақсатта адам аз орын іздегенін, сондықтан шалғайдағы ауылдық жерге шопан болып жалдамалы жұмысқа тұрғанын айтты.
Шопанды тінту кезінде пакеттен салмағы 3 келі 730 гр «кептірілген марихуана», 185 гр 99 мгр.«гашиш» және 67 гр 34 мгр. «каннабис шайыры» есірткі құралдары табылды.
Ал 36 жастағы жүргізушінің қалтасынан салмағы 5,88 гр «каннабис шайыры» есірткі заты табылып, тәркіленді.
— Ұсталғандар өз кінәларын толық мойындады. Қазіргі уақытта осы дерек бойынша Қазақстан Республикасы Қылмыстық кодексінің 296-бабы 4-бөлігмен (аса ірі мөлшерде есірткі құралдарын заңсыз сақтау) сотқа дейінгі тергеп-тексеру амалдары басталды. Осы баптың санкциясы 3 жылдан 7 жылға дейінгі мерзімге бас бостандығынан айыру түріндегі жазаны көздейді,-деді Жамбыл облысы ПД ЕҚҚІБ бастығы полиция полковнигі Әлім Бажықбаев.
