«Жасыл экономиканы» дамыту әлі күнге өзекті. Бұл мәселе Үкімет отырыстарында да жиі көтеріліп, инвесторлар тарту арқылы табиғат көздерінен энергия өндіруді қолға алу жиі сөз болып келеді. Жаңартылатын энергия көздерін дамыту және республикамызда төмен көміртекті экономикаға көшуі мәселелері қаралған тұста да бұл мәселе ғалымдардың назарынан тыс қалмағаны белгілі. Атап айтсақ, «Жасыл экономиканы» дамыту және жаңартылатын энергия көздеріне шетелдік инвестицияларды тарту перспективалары туралы 26-шы климаттық саммитте де бұл жан-жақты талқыланған болатын.
Қазіргі таңда облысымызда жел мен күннен және судан энергия өндіретін 327,6 МВт-тық 17 станса жұмыс істеуде. Бұл республика бойынша 21%-ы құрайды. Облыс аумағында орналасқан 5 күн, 6 су электр және 6 жел стансалары қалыпты жұмыс істеуде.
Бүгінде елімізде баламалы табиғат көздерден қуат алу мәселесі әлі де болса толық шешімін таппаған. Ал әлем дамудың жаңа, экологиялық тұрғыдан қауіпсіз жолдарын қажетсінеді. Міне, сондықтан да Қазақстан «Жасыл экономикаға» бет бұрды. Ал бұл еліміздің географиялық орналасу жағдайын, жел және күн энергиясын пайдалану мүмкіндігін, сондай-ақ мұнай және газ ресурстарының энергетикалық әлеуетін ескерсек, жалпы қажеттіліктің орнын толтыру үшін де тамаша мүмкіндік. Жалпы еліміздің сағатына 1 триллион кВт энергия өндіруге мүмкіндігі бар.
Біздің облысымыз «Жасыл экономика» бағдарламасын жүзеге асыруға қолайлы аймақ қатарына жатқызылып отыр. Облысымыздың Қордай ауданында бұған дейін «Виста-Интернешнл» ЖШС қуаттылығы 21 МВт-ты құрайтын, құны 6 мирд 362 милн теңгенің жобасы іске қосылса, енді «Ветро Инвест» ЖШС қуаттылығы 53,75 МВт-тық, құны 12 млрд 8 млн теңгенің жобасын жүзеге асырды. Бұл жоба Индустрияландыру картасы және «Бизнестің жол картасы – 2020» бағдарламалары бойынша мемлекеттің қолдауымен жүзеге асырылған еді.
Осы өңірде алғаш пайдалануға берілген «Отрар» күн электр стансасының да облысымызда алар орны ерекше. Құрылысының құны 200 млн теңгені құраған күн электр стансасының қуаттылығы – 504 кВт болды. Жалпы бүгінде «Отар» күн электр стансасының белгіленген қуаттылығы — 7 МВт. Бұл жоба «ҚазЭкоВатт» ЖШС жекеменшік инвестиция қаржысы есебінен бой көтерді. Ал Жуалы ауданындағы «Burnoe Solar-1» және «Burnoe Solar-2» ЖШС-ның күн электр стансасы Орталық Азиядағы ең ірі нысан болып табылады.
