Жамбыл облысында күн, жел және су арқылы электр энергиясын өндіретін стансалар салу үшін барлық жағдай жасалған. Сондықтан да бұл бағытта көбірек инвестиция тарту көзделген. Әрбірден кейін инвесторларды да қызықтыратын жобалардың бірі осы күн, жел және судан электр қуатын өндіретін стансалар болып табылады.
Облыс әкімдігі энергетика және тұрғын үй-коммуналдық шаруашылығы басқармасы басшысы Құдайберген Қорғанбаевтың айтуынша, қазіргі таңда аймақта жалпы қуаты 437,8 мегаватты құрайтын 18 нысан жұмыс істеуде. Оның жиынтық қуаты 24,4 мегаватын 6 су электр стансасы, 162,15 мегаватын 6 жел электр стансасы, сондай-ақ қуаты 251,25 мегаватты құрайтын 6 күн электр стансасы беруде.
Елімізде барлығы 2010,4 мегават қуаттылығымен 134 нысан жұмыс істеуде. Бұл ретте Жамбыл облысы жаңартылатын энергия көздерін пайдалану бойынша алдыңғы орында. Өткен жылы өңірдегі ірі жобалардың бірі, құны 49 миллиард теңгені құрайтын қуаты 100 мегаваттық «Жаңатас жел электр» стансасы пайдалануға берілсе, қуаты 9,2 мегават құрайтын Тасөткел су қоймасындағы су электр стансасының екінші кезеңі іске қосылды.
Ағымдағы жылдың мамыр айында Жамбыл ауданында жалпы қуаты 50 мегаватты құрайтын «AEC ASA» күн электр стансасының құрылыс жұмыстары аяталып, нысан пайдалануға берілген. Алдағы уақытта, қосымша жаңартылатын энергия көздері бойынша жалпы қуаты 13,5 мегаватты құрайтын 3 жел электр стансасың құрылыс жобалары іске асырылуда. Олардың барлығы Талас ауданында орналасқан. Атап айтсақ, қуаты 4,5 мегават «Шеңгелді ЖЭС», қуаты 4,5 мегават «Шеңгелді ЖЭС-2», қуаты 4,5 мегават болатын үшінші «Новатэекс ЖЭС» ЖШС құрылысы жүріп жатыр. Бұл нысандардың құрылыс жұмыстарын 2022 жылдың аяғына дейін аяқтау жоспарланған. Іске қосылғаннан кейінгі барлық үш жобаның жалпы қуаты 451,3 мегаватты құрайды, — дейді басқарма басшысы.
Оның айтуынша, ағымдағы жылдың 5 айында сағатына 1 826,7 миллион киловат электр энергия өндірілсе, оның 1 430,8 млн.кВтсағат электр энергия дәстүрлі энергия көздерінен, 395,8 млн. кВтсағат электр энергия ЖЭК нысандарынан өндірілген.
Бұдан бөлек, қолға алынған жобалар көп. Соның бірі Мойынқұм ауданында «Total Eren» ЖШС тарапынан жалпы қуаты 1 гигаватты құрайтын жел электр стансасын салу жоспарлануда. Қазіргі таңда бұл жоба аясында инвесторлармен келіссөздер жүргізілуде.
