Мәжіліс депутаты Нартай Сәрсенғалиев премьер-министрге осылай деп сауал жолдады.
Биылғы ахуал да мәз емес. Ресми мәліметке сүйенсек, биыл 1223 елді-мекен су басу қаупі бар аймақта тұр. Қазірдің өзінде Ресейден еліміздің батыс өңіріне су жоспардағыдан
көп жіберіліп жатыр деген дерек бар.
«Былтыр су астында қалған аймақтардың әкімдіктерінен ресми ақпараттарды алдырдым, 2025 жылы төтенше жағдайдың алдын алуға қанша қаражат дайындап қойғанын айтайын, бұқара білсін.
Ақмола облысы 131,5 млн теңге, Ақтөбе облысы
848,7 млн теңге, БҚО 10,5 млрд теңге, Павлодар облысы
3,6 млрд теңгені бюджеттен қарастырған.
Әрі қарай, Абай әкімдігі 2025 жылы су тасқынының алдын алуға жергілікті бюджеттен 67 млн. теңге, Атырау облысы 22,1 млрд теңге, Қарағанды облысы 6 млрд теңге, Қостанай облысы 916,2 млн теңге, Солтүстік Қазақстан облысы
2,5 млрд теңге дайындап қойған. Қаражат бар, бірақ ол тістегеннің аузында, ұстағанның қолында кетпеуі шарт» дейді депутат.
Былтыр көзіміз жеткен тағы бір өзекті мәселе су өткелдері мен арықтардың тазаланбаған күйі жылдап жатқаны.
Тіпті кей аймақтарда өзендердің жайылмасы тұрғын үй алабына айналып кеткен. Былтырғы қателіктен сабақ алып аталған
су арналарын ашу қажет. Бұдан бөлек, еліміздегі
су қоймаларының көбі қараусыз қалған, біразы жекеменшікке берілген. Тиісінше тиісті күтім жоқ. Салдарынан гидрологиялық нысандардың тоз-тозы шыққан. Бұл проблеманың айтылғаны бүгін немесе кеше емес. Бірақ ескерту бар да, ескеру болмай тұр. Биыл да халық тасқыннан тентіреп кетпесін десек, аталған проблемаларды дереу шешу қажет.
Фото: azattyq-ruhy.kz
