Талғарда жұмысшылардың қар басқан тротуарға асфальт төсеу сәті видеоға түсіп қалды, деп хабарлайды Stan.kz ақпарат агенттігі.
Видео авторының айтуынша, түсірілім кезінде ауа температурасы 0 градустан жоғары болмаған. Талғар ауданының әкімі Қайдар Әбдіханов оқиғаға қатысты түсініктеме берді.
«Аудан басшысы абаттандыру жұмыстарын қадағалайтын Талғар қаласы әкімінің орынбасары Серік Дүмчебаевқа қатаң сөгіс жариялады. Салғырттыққа жол беріп, мердігердің жұмысын тиісті деңгейде бақыламаған», — деп хабарлады әкімдіктің баспасөз қызметі.
Әкімдік бұл оқиғаны «әкім орынбасарының жол беруге болмайтын салғырттығы мен тікелей міндеттерін білмеуі» деп атады.
«Қала әкімінің осыған назар аударып, шара қолдануын талап етемін», — деп келтіреді баспасөз қызметі аудан әкімінің сөзінен.
