Облыстың ормандары – бұл маңызды қорғау қызметін атқаратын табиғи кешен. Орман алқаптары көлемінің жартысынан астамын сексеуіл құрайды. Жыл сайын Жамбыл облысының аумағында жануарлар әлемін, ағаштарды, бұталар мен сексеуілді жоятын орман мен дала өрттері тіркеліп отырады. Сексеуіл ормандарындағы өрттердің нәтижесінде олардың құм көшкінін ұстау қабілеті төмендейді. Мұндай өрттер үлкен аумаққа таралып, орман-дала өрттеріне өтеді, сонымен қатар оларды өшіру үшін өртке қарсы қызметі күші мен құралдарының негізгі бөлігі бөлінеді де, нәтижесінде елді мекендер өртке қарсы қорғаусыз қалып, ауыл шаруашылығы алқаптарына қауіп төнеді.
Биыл облыста өрт қауіпі бар маусымы 24 наурыздан басталып кетті. Осыған байланысты, орман қорындағы орманшылықтарда 34 өрт бақылау мұнарасы жұмыс жағдайына келтіріліп, өрт қауіпті аумақтардағы 63 бекетте тәулік бойына кезекшіліктер ұйымдастырылуда. Орман қорғау қызметкерлерінен құрылған өрт сөндіруші топтарында 557 адам тартылған. Олар арнайы курстан өтіп, сертификат алып, киім-кешекпен қамтылған.
Облыс әкімдігі табиғи ресурстар және табиғат пайдалануды реттеу басқармасының бас маманы Болатжан Ахтанбердінің айтуынша, орман қорында 355 рейдтік іс-шара ұйымдастырылып, өрт қауіпсіздігі ережелерін бұзған 20 адамға хаттама толтырылып, оларға 336,8 мың теңге айыппұл салыныпты. Айыппұлдар бүгінгі таңда өндірілген.
Орман қорында өрт қауіпсіздігін қамтамасыз ету және өрттің алдын алу жөніндегі профилактикалық іс-шара жоспары бойынша 11154,5 км минералдандырылған жолақтарға күтім жасау жұмыстары мамыр айында толығымен орындалыпты. Бұдан бөлек, өрт қауіпсіздігі талаптарын түсіндіруге бағытталған үгіт-профилактикалық іс-шаралары жоспары бойынша БАҚ-та – 20 мақала, өрт қауіпсіздігін сақтау мәселелері бойынша – 986 парақша, 21 жиналыстар мен дәрістер өткізілген.
Бүгінгі таңда орман шаруашылығы мекемелері 122 әртүрлі маркадағы жеңілавтокөліктермен, 79 трактор және 77 соқа тіркемесімен қамтылған. Одан бөлек, 55 мотоцикл, 14 АЛФ өртке қарсы агрегаты, 12 өрт сөндіру автокөлігі бар. Өртсөндірушілер негізгі құрал-жабдықтармен толық қамтамасыз етілген. Биыл материалдық-техникалық базаны жақсарту мақсатында бюджеттен 87 млн теңге бөлініп, оған 2 трактор, 21 қосымша агрегаттар алынды. Қазіргі таңда мекемелердің материалдық-техникалық базасы 78 пайызды құрап отыр, — дейді басқармасының бас маманы Болатжан Ахтанберді.
