Әрбір азаматтың, оның ішінде, жастардың өзін-өзі танытуы үшін барынша қолайлы жағдайлар жасау қажет. Еліміздегі түрлі бағдарламалар жастардың жұмысқа орналасуына, тұрғын үймен қамтамасыз етілуіне, әлеуметтік бастамаларына қолдау көрсетуге бағытталған. Осы бағыттағы жұмыс әрі қарай жалғаса береді.
Жақында Шардара аудандық «Жастар ресурстық орталығы» жаңа ғимаратқа жайғасты. Нысан күрделі жөндеуден өтіп, жас мамандардың игілігіне ұсынылды. Қазір орталық кәсіп бастағысы келетін жалынды жастарға, мемлекеттік бағдарламалар мен жобаларға алтын көпір болып тұр.
Мамандардың айтуынша, биыл әр түрлі тиімді пайыздық көрсеткіштермен грант иегері атанған шардаралықтардың саны көп.
Ал, Сарыағаш ауданында «17 қараша — Халықаралық студенттер» күніне орай, студент жастардың бойындағы шығармашылық қабілеттерін және білімге, өнерге деген құштарлығын арттыру мақсатында «Қызыққа толы студенттік өмір» атты аудандық фестиваль өтті.
Студенттерге арналған мерекелік шараға аудан әкімі Арман Абдуллаев, Президент жанындағы Ұлттық құрылтай мүшесі, «Дарын» жастар сыйлығының иегері, айтыскер ақын Біржан Байтуов, Облыстық Жастар ресурстық орталығының басшысының орынбасары Пердебек Есқұловтар қатысып, жастарды мерекемен арнайы құттықтады.
— Әр адамның есінде ерекше естеліктерімен жатталып қалатын студенттік шақ ешқашан ұмытылмайды. Қызығы мен шыжығы мол студенттік кезең әрдайым әсерлі де қызықты әңгіменің арқауы болары хақ. Сіздер жастық шақтың ең қызықты белесі – студенттік өмірге қадам басып, қызыққа толы күндерді бастан өткеріп жатырсыздар. Бұл күндер сіздер үшін мәңгі ұмытылмас, сағынышқа толы кезең болып қалатынына еш күмәнім жоқ. Ересек өмірге білікті маман ретіндегі қадамдарыңыз бүгіннен басталатынын ескеріп жүріңіздер. Сіздерден күтеріміз көп, сол күткен биіктерден көрінсеңіздер – сіздерге абырой, бізге мақтаныш, — деп аудан әкімі студенттерге жылы лебізін білдірді.
Фестиваль студенттердің ақпараттық технологиялар саласы бойынша сонымен қатар, өз мамандықтарының жаңашыл еңбектерімен қолөнер бұйымдарынан ұйымдастырылған көрмеден басталды. Фестиваль шарттарына сәйкес қатысушы колледждер жоғары дайындықпен келіп, ұмытылмас студенттік шақтың қызыққа толы ғұмырын көрініс арқылы, сондай-ақ өздерінің өнерімен көрермендерді тәнті етті.
Фестивальдің қорытындысы бойынша: «Білімді ұрпақ» кезеңі бойынша І орын Қапланбек жоғары аграрлық техникалық колледжіне,
«Менің Колледжім» кезеңі бойынша Абу Али Ибн Сина колледжіне,
«Ұмытылмас студенттік шақ» кезеңі бойынша 1 орын Арыстанбаб жоғары колледжіне,
«Ұмытылмас студенттік шақ» кезеңінің тақырыптық көрінісі бойынша 1 Сарыағаш медресе колледжіне бұйырды. Жеңімпаздар аудан әкімінің арнайы алғыс хаттарымен марапатталып, бағалы сыйлықтар табысталды.
Айта кетсек, қазіргі таңда Сарыағаш ауданында 6 арнаулы орта оқу орнында 5076 студент білім алуда, 1283 студент жатақханамен қамтылған. Сонымен қатар, 2024 жылы аудандағы 5 колледжге 1075 мемлекеттік тегін оқу гранттары бөлініп, студенттеріміз тегін білім алуда.
Жалпы алғанда Халықаралық студенттер күні әлемнің түкпір-түкпірінде бар сән-салтанатымен тойланады. Осы орайда Келес ауданында Студенттер күніне арналған гала концерт өтті. Салтанатты шараға Келес ауданы әкімі Жәнібек Ағыбаев қатысып, тың идеяларға толы студенттерді мерекемен құттықтады.
– Баршаңызды халықаралық студенттер күнімен құттықтаймын. Сіздер жастық шақтың ең қызықты белесі – студенттік өмірге қадам басып, қызыққа толы күндерді бастан өткеріп жатсыздар. Бұл күндердің сіздер үшін мәңгі ұмытылмас, сағынышқа толы кезең болып қалатынына еш күмәнім жоқ. Жастар қашанда оқу-біліммен үздіксіз еңбектің арқасында ғана жақсы нәтижеге жетеді. Студент жастарымыздың жан-жақты, саналы, терең білімді, бәсекеге қабілетті болуы — қашанда қоғам сұранысы. Олай болса баршаңызды мерекемен құттықтап, алдағы оқу жылында тек толағай табыстар мен шығармашылық даму тілеймін, — деді аудан басшысы өз құттықтауында.
Мерекелік шара барысында аудан орталығындағы №13 колледждің оқу ісі жөніндегі орынбасары Шынайев Нұржігіт 1 – курсқа түсіп, кәсіп иесі атануды мақсат еткен өрендерге студенттік билет табыстады. Шара соңы аудандық мәдениет үйінің дайындаған концерттік бағдарламасына ұласып, эстрада жарық жұлдызы, жастардың сүйікті жас әншісі BYTANAT көпшілікке мерекелік көңіл-күй сыйлады.
Айта кетейік, Келес ауданында 14-35 жас аралығындағы жастар саны — 41 157 немесе халық санының 30% құрап отыр. Келес өңірінде 1 орта арнаулы оқу орны орналасқан. Оқу орнында 442 студент білім алуда. Студенттерді жатақханамен қамтамасыз ету мақсатында сыйымдылығы 240 орынмен қамтылған. Аталған оқу орнының студенттерімен ұдайы жұмыстар атқарылып, жастардың саяси, әлеуметтік даму жолында бірқатар жұмыстар жасалуда.
Ал, Сайрам ауданының “Жастар ресурстық орталығы” КММ-нің ұйымдастыруымен жастар арасында білім мен зияткерлікті ұштастырып, дарындыларды анықтау мақсатында “Эрудит” интеллектуалды ойыны өткізілді.
Шараның ашылуында Түркістан облысының қоғамдық даму басқармасы “Жастар ресурстық орталығы” КММ басшысы Ернар Нұралыұлы, аудан әкімінің орынбасары Мадияр Бақтыбайұлы, аудандық мәслихат депутаттары Асанәлі Исламбекұлы мен Дархан Саматұлы сөз сөйлеп, қатысушыларға сәттілік тіледі.
Бұл зияткерлік сайыс жастардың білімге деген қызығушылығын арттыру, олардың ой-өрісін кеңейту және логикалық әрі шығармашылық қабілеттерін дамытуға бағытталған маңызды жоба болды. Сонымен қатар, сайыс жастардың өзара ынтымақтастығын нығайтып, командалық жұмыс дағдыларын жетілдіруге де ықпал етті.
Жарысқа облыстың 17 ауданынан, қалаларынан келген 15 команда қатысып, әртүрлі сала өкілдері мен жас еріктілер арасындағы білім мен біліктіліктерін ортаға салды. Жарыс 5 кезеңнен тұрып, әр кезеңде қатысушыларға ұлттық дәстүр және логикалық тапсырмаларға жауап беру міндеті қойылды. Тартысты сайыс барысында қатысушылар өздерінің зияткерлік әлеуетін танытты.
Барлық кезеңдерде Созақ ауданының “Теріскей” командасы ауданның намысын абыроймен қорғап, үлкен жетістікке қол жеткізді. Жарыс қорытындысы бойынша жеңімпаз атанып, І орынға ие болды. Ал ІІ орын Түркістан облысының Келес ауданының “Алаш” және “Келес” командаларына бұйырды. Үздік үштікті Сайрам ауданының “Бәйтерек” командасы қорытындылады. Сонымен қатар, “Үздік талпыныс” номинациясына Сарыағаш ауданының “Конина Power” командасы лайық деп табылды.
Байқаудың жеңімпаздары мен жүлдегерлеріне арнайы алғыс хаттар мен қаржылай сыйлықтар табыс етілді.
Фото: Сарыағаш ауданы әкімдігі
