Ішкі істер министрі Ерлан Тұрғымбаев сотталғандарды медициналық қызметпен қамтамасыз ету функциясы неге Денсаулық сақтау министрлігіне берілетінін түсіндірді, деп хабарлайды ҚазАқпарат.
Бұл жөнінде ведомствоның ақпарат алаңында Ішкі істер министрлігінің баспасөз өкілі Шұғыла Тұрлыбек айтты. «Ерлан Тұрғымбаев сотталғандарды медициналық қамтамасыз ету функциясын Денсаулық сақтау министрлігінің қарамағына беру туралы хабарлады», — деді министрлік өкілі.
Министрдің өзі мұны сотталғандарды ұстау орындарындағы заңсыздықтарды бүркемелеуге жол бермейтін қадам деп бағалап отыр.
«Бұл тексеру диагностика және емдеудің заманауи әдістеріне неғұрлым қол жеткізуге мүмкіндік береді және медицина қызметкереріне мекемелердің әкімшілігінен тәуелсіз қызмет ететін болады. Бұл өз кезегінде заңсыз әрекеттердің ықтимал фактілерін жасыруды жояды», — деді министр. Баспасөз өкілінің айтуынша, Ішкі істер министрлігі сотталғандарды тұрғылықты жері бойынша колонияға ауыстыру рәсімін заң аясында жеңілдеткен.
«Дәрі-дәрмекке қатысты шектеулер жойылды. Науқастану бойынша босату туралы өтініштерді қарау мерзімі қысқартылды. Өтініштерді электронды түрде жіберу құқығы берілді. Ұстау жағдайларын жақсарту бөлігінде биыл ақпан айында сотталғандардың тамақтану нормалары — 40 пайызға, сәлемдеме мен сауқаттардың рұқсат етілген салмағы үштен бірге артты. Өзімен бірге алып жүретін сәлемдемелердің және сатып алуға рұқсат ететін заттардың тізбесі кеңейтілді. Өткен жылдан бастап колонияларда электрондық дүкендер енгізіле бастады. Сондай-ақ, кездесулер саны артты», — деді Шұғыла Тұрлыбек.
Ведомство өкілінің айтуынша, жұмысқа орналастырылған сотталғандардың саны былтырдан бері 38 пайыздан 49 пайызға дейін артқан.
