Шымкент қаласындағы тұмау және ЖРВИ таралу жағдайы күрделене түскен, деп хабарлайды ҚазАқпарат.
Жыл басынан бері 2 ай ішінде жедел респираторлы вирусты инфекциялар жұқтырған 7962 жағдай тіркелген. Бұл көрсеткішті өткен жылдың сәйкес кезеңімен салыстырғанда аурушаңдықтың 2,31 есеге жоғарылағанын көруге болады.
Сондай-ақ, науқастанушылардың арасында 14 жасқа дейінгі балалар көп. «Тұмаудың алдын алу мақсатында жергілікті бюджет есебінен қаражат бөлініп, 130 000 доза «Гриппол+» вакцинасы тегін егуге алынды. Вакцина жалпы қала халқының 12%-ын қамтуға жұмсалды. Ақылы түрде жұмыс берушінің есебінен 537 адамға егілді», — деді Шымкент қаласының санитариялық-эпидемиологиялық бақылау департаменті басшысының орынбасары Айгүл Тұрымбетова.
Екпе тәуекел топқа жататын медициналық ұйымдарда диспансерлік есепте тұрған балаларға, алты айдан асқан әлсіреген және жиі ауыратын балаларға, балалар үйлерінің, сәбилер үйлерінің балалары мен қарттар, мүгедектер үйлерінің контингентіне және медицина қызметкерлері мен жүкті әйелдерге егілген.
«Тұмау және ЖРВИ-мен ауырмау үшін салауатты өмір салтын ұстану маңызды. Ол үшін дұрыс ұйқы, дәрумендер мен микроэлементтерге бай салауатты тамақтану қажет. Физикалық белсенділікті арттырып керек. Спортпен шұғылданып, ашық ауада жиі серуендеген дұрыс. Тұмаудан қорғау және басқаларға жұқтырмау үшін қарапайым ережелерді сақтау қажет», -деді ол.
Ал, Шымкент қаласында коронавирустың эпидемиологиялық жағдайы тұрақты. Қалада COVID-19-ға ПТР тексеру 15 зертханада жүргізілуде. Екпе егу жұмыстары да жоспарға сәйкес жүргізіліп жатыр. Шымкент қаласының Бас мемлекеттік санитариялық дәрігерінің қаулысына сәйкес шектеу шаралары жеңілдетілген.
Дегенмен, медициналық ұйымдарда, қылмыстық-түзеу мекемелеріне барғанда, үй карантині жағдайында бетперде кию талабы өз күшінде қалып отыр.
