Бүгінгі таңда Шу ауданы да мүмкіндіктерінің қолайлылығымен еліміздің энергетика саласына үлес қоса бастады. Онда қуаты 9,2МВт-тық «Тасөткел» су электр стансасы жұмыс істеп тұр. Жобаның инвесторы – «Компания A&Т-Энерго» ЖШС. Бұл гидроэлектр стансасы жылына сағатына 45,6 млн кВт электр қуатын өндіруге қауқарлы.
Өткен жылы Шу ауданындағы «Тасөткел» су электр стансасының екінші кезеңі іске қосылды. Инвестициялық компания өкілдерінің айтуынша, бұл жобаның артықшылығы қыс мезгілінде судың екпіні артады да, осы уақытта қуат көзіне деген сұраныс та жоғарылай түседі. Ал бұл жер облысымыздағы су қоры мол жалғыз нысан болып табылады.
Жалпы ауданда барлығы – 102 су жүйелерінің нысандары бар. Оның 11-і гидротехникалық құрылыс, атап айтқанда, 3 су қоймасы, 4 су бөгеті, 1 су торабы, 3 магистралды канал, сондай-ақ 91 шаруашылық канал бар. Бұл су жүйелерінің 96-ы «Қазсушар» РМК-ң Жамбыл филиалының теңгерімінде. 5 су нысаны «Жамбыл су қоймалары» КМК-ң теңгерімінде болса, 1 нысан жеке меншікте. Ол, яғни жоғарыдағы су электр стансасы орналасқан «Тасөткел» су қоймасы.
Бұл су қоймасында 457 миллион текшеметр су жиналады. Қойма 28261 гектар алқапты сумен қаутуға қауқарлы. «Тасөткел» су қоймасы сол және оң жағалау магистралдық каналдары арқылы аудан шаруашылықтарын сумен қамтамасыз етеді. Тасөткел магистралды каналының ұзындығы –39,035 километр, сол жағалау магистралды каналыңын ұзындығы -38,8, оң жағалау мағистралды каналының ұзындығы — 48,8 км. Жалпы бекітілген көлемі – 34 535 га.
Серіктестік директоры Саид Ахаевтың айтуынша, бұл компания аймақта гидро, жел және күн электр стансаларын салу және пайдаланумен айналысады. «Тасөткел» су электр стансасын салу 2013 басталып, оның құрылысы бірнеше жыл жүргізілген. Жоба құны 1 млд 362,4 млн теңгені құрайды.
Ал серіктестік ағымдағы жылдың бірінші жартыжылдығында сағатына 23113681 киловат қуат өндіріп, 391733478,57 теңге табыс тапқан. Электр қуатының 1 кВт/сағат үшін жобаланған тариф құны – 17 теңге. Ал пайдалануға берілген кезеңнен бастап, өтімділік мерзімі 6 жыл. Оның игілігін ауданның тұрғындары көруде.
