16 қараша күні Ақмола облысының Шортанды ауданындағы жеке үйлердің бірінде газ баллоны жарылып, үш адамның қаза тапқанын хабарлаған болатынбыз. Бүгін қарындасын құтқармақ болып, өртеніп жатқан үйге қайта кірген 11 жастағы Оразалы Жарқынбек көз жұмды деп хабарлайды KAZ.NUR.KZ тілшісі.
Қаралы хабарды муайтай спортымен айналысатын Оразалының жеке бапкері Жандос Есенаманов жеткізді. Бапкердің айтуынша, Оразалының әкесі мен 9 жасар қарындасы да ауыр халде жатыр. Айта кетелік, 16 қараша күні Шортандыдағы жеке үйлердің бірінде газ баллоны жарылып, 11 адам ауруханаға түсті. Олардың қатарында муатайдан балалар арасындағы Қазақстан чемпионы Оразалы Жарқынбек те бар еді.
Туыстарының мәліметінше, Оразалыны әкесі құтқарып, өртеніп жатқан үйден далаға шығарған. Бірақ жас спортшы қарындасын құтқару үшін үйге қайта кірген кезінде өрттен төбедегі ағаштар құлап, астында қалып қояды. Нұр-Сұлтандағы балалар ауруханасының жансақтау бөліміне жеткізілген Оразалы есін жимастан, көз жұмды. Аталған апаттан оның анасы мен төрт жасар қарындасы оқиға орнында тіл тартпай кеткен еді.
Төрт баланың ең кішісі, бір жарым жастағы сәби жансақтау бөлімінен палатаға ауыстырылды.
Оразалы Жарқынбек талантты спортшылардың қатарынан болған. Ол муатайдан облыс және республика чемпионы атағын жеңіп алған.
