Елімізде табиғат көздерінен балама энергия көздерін өндіру 2010 жылдардан басталды. Оның бұдан ары қарай жедел дамуына Нұр-Сұлтан қаласында өткізілген «ЭКСПО – 2017» халықаралық көрмесі себепші болды.
Бүгінгі таңда республикамызда жиынтық қуаты 1 984,4 мегаватты құрайтын 127 электр стансасы жұмыс істеуде. Салыстырмалы түрде қарайтын болсақ нысандардың басым көпшілігі Жамбыл, Алматы, Түркістан және Қарағанды облыстарында орналасқан.
Облыс әкімдігі энергетика және тұрғын үй-коммуналдық шаруашылық басқармасының басшысы Құдайберген Қорғанбаевтың айтуынша, республикалық 1 984 МВТ-тық жиынтық қуаттың 21 %-ы біздің облысымызға тиесілі екен. Бұл облыстың аталған саладағы өз потенциалын тиісті деңгейде пайдаланып отырғандығын көрсетеді.
Өткен жылы ел игілігіне берілген үлкен жобаның бірі ол Сарысу ауданындағы 100 МВт-тық «Жаңатас жел электр» стансасы болса, ал биыл Жамбыл ауданындағы 50 МВт-тық «Айша күн шуақ» күн электр стансасы жұмысын бастап отыр. Алғашқысына инвесторлар тарапынан 49, екіншісіне 20 млрд теңге жұмсалған.
Аймақтағы жел энергиясы потенциалының үлкен болуына орай биыл тағы бір ірі жоба, қуаттылығы 100 МВт-ты құрайтын «Сарысу жел электр» стансасының құрылысы басталып кетті. Бұдан бөлек, Жамбыл ауданындағы Аса ауылында 20 МВТ-тық күн электр стансасын салу көзделуде. Сондай-ақ, Талас ауданында әрқайсысы 4,5 МВт-тық 3 жел электр стансасы, Жуалы ауданында Көксай өзенінде қуаттылығы 13,8 МВт-тық су электр стансасын салу жоспарланған. Аталған 6 жоба пайдалануға берілген уақытта, облыстағы баламалы энергия көздерінің қуаттылығы қосымша 177,4 МВт-қа артып, 565,2 МВт-тық-қа жетпек.
