ҚР Мемлекеттік қызмет істері агенттігінің Жамбыл облысындағы Әдеп жөніндегі кеңес отырысында баяндама жасаған Мемлекеттік қызмет саласындағы бақылау басқармасының бас маманы Еламан Інжаттың айтуына қарағанда Жамбыл облысы әкімдігінің цифрлық технологиялар басқармасының қызметтік автокөлігі (мемлекеттік нөмері 594AS08) ағымдағы жылдың 4 сәуірінде түнгі сағат 00:44-те, яғни жұмыстан тыс уақытта Тараз-Қайнар тас жолының 476,55 шақырымында жылдамдықты асырғаны үшін әкімшілік жауапкершілікке тартылғандығы анықталып, салынған әкімшілік айыппұлдың мөлшері 36 920 теңгені құраған.
Сондай-ақ, Байзақ ауданы Дихан ауылдық округі әкімі аппаратының қызметтік автокөлігі (мемлекеттік нөмері 956АН08) ағымдағы жылдың 30 наурызында сағат 15:56-да (демалыс күні) Батыс Еуропа Батыс Қытай тас жолының 351 шақырымында (Ақтоған ауылы) жылдамдықты асырғаны үшін әкімшілік жауапкершілікке тартылғандығы анықталып, салынған әкімшілік айыппұлдың мөлшері 18 460 теңгені құраған.
Осылайша Меркі ауданы әкімі аппаратының қызметтік автокөлігі (мемлекеттік нөмері 087JO08) ағымдағы жылдың 21 сәуірінде түнгі сағат 03:19-те (демалыс күні) Алматы-Бішкек тас жолының Қаскелең қаласына қарай бағытта жылдамдықты асырғаны үшін,
Жамбыл ауданы әкімі аппаратының қызметтік автокөлігі (мемлекеттік нөмері 074JO08) ағымдағы жылдың 4 мамырында кешкі сағат 19:00-де (демалыс күні) Тараз қаласында жылдамдықты асырғаны үшін,
Қордай ауданы әкімі аппаратының қызметтік автокөлігі (мемлекеттік нөмері 053JO08) ағымдағы жылдың 16 маусымында түнгі сағат 02:11-де (демалыс күні) Тараз қаласында жылдамдықты асырғаны үшін,
Тараз қаласы әкімдігінің тұрғын үй қатынастары бөлімінің қызметтік автокөлігі (мемлекеттік нөмері 455AF08) ағымдағы жылдың 5 мамырында кешкі сағат 18:40-де (демалыс күні) Тараз қаласында жылдамдықты асырғаны үшін,
Шу ауданы әкімдігінің ауыл шаруашылығы бөлімінің қызметтік автокөлігі (мемлекеттік нөмері 696AN08) ағымдағы жылдың 23 мамырында түнгі сағат 00:13-де (жұмыстан тыс уақытта) Батыс Еуропа — Батыс Қытай тас жолының Кенен ауылында жылдамдықты асырғаны үшін әкімшілік жауапкершілікке тартылғандығы анықталып, әр көлік жүргізушісіне 18 460 теңге көлемінде әкімшілік айыппұл салынған.
Ал, Мойынқұм ауданы әкімі аппаратының қызметтік автокөлігі (мемлекеттік нөмері 118JO08) ағымдағы жылдың 25 наурызында таңғы сағат 06:19-да (мереке күні) Меркі-Шу-Бурылбайтал тас жолының 191 шақырымында жылдамдықты асырғаны үшін,
Жуалы ауданы әкімдігінің жұмыспен қамту және әлеуметтік бағдарламалар бөлімінің қызметтік автокөлігі (мемлекеттік нөмері 113AP08) ағымдағы жылдың 11 наурызында таңғы сағат 05:05-те (жұмыстан тыс уақытта) Шымкент-Тараз тас жолының 534,62 шақырымында жылдамдықты асырғаны үшін әкімшілік жауапкершілікке тартылып, 36 920 теңге әкімшілік айыппұл салынған.
Жалпы қызметтік автокөліктерді қызметтік емес мақсаттарда пайдалану фактілері Жамбыл облысының Жамбыл ауданында – 4 факті, Меркі ауданында – 3 факті, облыс әкімдігінің білім басқармасына қарасты бөлімдерінде – 3 факті, Байзақ ауданында – 2 факті, Мойынқұм ауданында – 1 факті орын алған.
Айта кететін бір жәйт, бұл фактілер жол бойындағы бейнекамералар арқылы анықталған. Сондықтан бейнекамера арқылы дәл сол көлікте сол уақытта мекеме басшысы болды ма, жоқ па анықтау мүмкін емес. Әрине, басшысыз шопырдың демалыс немесе қызметтен тыс уақытта және тіптен алыс жақта қыдырып жүруі мүмкін емес сияқты.
Дегенмен ҚР Мемлекеттік қызмет істері агенттігінің Жамбыл облысындағы Әдеп жөніндегі кеңестің төрағасы Руслан Шарипов қызметтік автокөліктерді қызметтік емес мақсаттарда пайдаланған осынау фактілерді жіті тексеріп, қызметтік көлік демалыс күндері басқа жақта не мақсатпен жүргені және кімнің кінәлі екені нақты дәлелденуі керек екенін айтты.
Шынында басшының рұқсатынсыз қызметтік көліктің жүргізушісі түн ішінде тіптен алыс жақта өзінің шаруасымен қыдырып жүруі мүмкін бе?
Қызметтік көлікпен түн ішінде қыдырып жүрген бастық па, әлде шопыр ма?
Фото: OLX.kz
