Жамбыл облыстық мәслихатының кезекті XV сесиясында депутат Жұмахан Танкебаев Қожағапар ауылынан 50 орындық мектеп салу жобасы қашан қолға алынатынын сұрады.
— Биылғы жылы бұл мектепке берілген лицензия уақыты бітеді. Яғни, қайтадан аттестациялау керек, — дейді депутат Жұмахан Мұқашұлы. — Ал, дәл осы күйімен мектеп қайтадан лицензияға қол жеткізе ала ма? Ала алмаса мектептің жабылып қалу қаупі бар. Бұған дейін Қожағапар ауылының ауызсуына қаржы бөлінді. 500 млн теңгеге қазір ауылға ауыз су тартылып жатыр. Газ тартуға қаржы қарастырылуда. Амбулатория салынды. Енді мектеп салу үшін жобалық-сметалық құжаттар жасауға қаржы бөлуге ұсыныс берілген. Бірақ қолдау таппай тұр. Негізі AMANAT партиясының сайлауалды бағдарламасында бұл ауылдан мектеп 2024 жылы салу жоспарланған еді.
Бұл мәселеге байланысты Жамбыл облыстық экономика және бюджеттік жоспарлау басқармасының басшысы Сандуғаш Абдралиева жауап берді.
— Бюджеттік жоспарлауда басымдық деген ұғым бар, — дейді Сандуғаш Ермаханқызы. — Әр мәселе кезең-кезеңімен шешіледі. 2024 жылы 19 мектептің құрылысына жобалық сметалық (ЖСҚ) құжат әзірленуде. Облыстық бюджеттен 293 млн теңге бөлінген. Егер бір жылда барлық ЖСҚ дайындауға қаржы бөлетін болсақ олардың көбісі күйіп кетер еді. Иә, AMANAT партиясының сайлауалды бағдарламасында бұл мектеп бар. Оны да айта кетейін. 2024 жылы біраз мектептерге қаржы республикадан бөлінуі керек еді. Алайда республикалық бюджетте қаржы тапшылығы орын алып, трансферттерден қаржы толық түспегендіктен көптеген құрылыстарды облыстық бюджеттен шешуге тура келіп тұр. Егер қаражат республикадан бөлінген кезде басқа мектептердің құрылысына қаржы бөлуге мүмкіндік болар еді. Сондықтан ең алдымен жоғарыда айтқан 19 жобаны жүзеге асыруға күш саламыз. Одан артылған қаржы басқа мектептерге ЖСҚ дайындауға жұмсалады.
Естеріңізге сала кетейік, Жамбыл облыстық мәслихатының XV сесиясында 2024-2026 жылдарға арналған облыстық бюджетке өзгерістер енгізілді.
