«Бұл әлеуметтік маңызды жобаның бірі. Міне, аурухана салынады дегелі бері екінші жылға кетіп барады. Әлі құрылысы басталған да жоқ» дейді Марат Сейітбекұлы.
Бұл сұраққа «Аманат» партиясы Жамбыл облыстық филиалында өткен жылы атқарылған жұмыстардың қорытындысы туралы есеп берген Қордай ауданының әкімі Бегзат Болатбеков жауап берді.
— Иә, 270 адамды қабылдайтын жобалық смета әзірлеген, — дейді бұл жөнінде Б. Болатбеков. — Тапсырыс беруші – Жамбыл облыстық құрылыс басқармасы. Кемшіліктер бар, мойындаймыз. Өйткені сметалық құжатты әзірлеген кезде аурухана салынатын жерге инфрақұрылым жүргізуге әлі тапсырыс берілген жоқ еді. Бұл аурухана құрылысына «Ауылдық денсаулық сақтауды жаңғырту» Ұлттық жобасы аясында қаражат бөлінген. Бірақ сараптамадан өтпегендіктен тоқтап тұр. Қазіргі таңда инфрақұрылымға аудандық бюджеттен қаржы бөліп, іске асыратын болды. Сәуір айында сараптаманың қорытындысын алып, бірінші нақтылауда республикалық бюджетке бұл жобаны ұсынатын боламыз. Бүгінде Қордай ауданында халық саны биыл 160 мыңға жетті. Сондықтан бұл аурухана бізге өте қажет. Қазіргі аурухана қатты ескірді.
Осы тұста айта кету керек, 28-ақпан күні өткен Жамбыл облыстық мәслихатының кезектен тыс ХІІ сессиясында бюджетке нақтылау енгізіліп, Қордай мен Сарысу аудандық орталық аудандық аурханаларына лифт сатып алуға 72 млн теңге жоспарланған болатын. Бірақ депутаттар «Егер Қордайда аудандық аурухана жаңадан салынатын болса ескі ауруханаға соншама қаржыға лифт сатып алудың не қажеті бар?» деген пікірлерін айтқан еді. Нәтижесінде аудандық ауруханаларға лифт сатып алу қаржысы басқа көздер арқылы шешілетін болды.
