Қордай жел электр стансасының қуаты 150 мың халықты жарықпен қамтуға жетеді
«Жасыл» экономика туралы сөз қозғаған сәтте біз Қордай ауданын айналып өтіп кете алмаймыз. Өйткені бұл ауданның күн, жел және су көздерінен электр энергиясын өндіру әлеуеті жоғары. Бүгінгі таңда республикамызда «Жасыл» экономиканы дамыту аясында 90-ға жуық жаңа жоба енгізіліпті. Ал біздің облысымызда 2011-2021 ж. ж. аралығында 15 нысан пайдалануға беріліп, күн, жел және судан электр өндірісі 17-і нысанға жоғарылаған. Бұл нысандардың қуаттылығы 387,8 МВт-ты құрайды. Мұның 201,25 МВт-ы күн, 162,15 МВт-ы жел, 24,4 МВт-ы су электр стансаларына тиесілі.
Облысымызда жел электр стансалары іске қосылғаннан бастап сағатына 130 млн кВт-тан астам экологиялық таза энергия өндірілуде. Соның ішінде Қордай асуындағы қуаттылығы 52,4 МВт құрайтын жел электр стансасы 3 бірдей компанияға қарайды.
Соның бірі — «Изен-Су» ЖШС. Бастапқыда оның жылдық қуаттылығы бар болғаны 1,5 МВт-ты құраған болатын. Ал оның жобалық құны 329,6 млн теңгені құрады. Оған 35 га жер телімі бөлінді. Өткен жылы электр стансасында 5,2 млрд теңгені құрайтын 138 млн 358 мың кВт электр қуаты өндірілген.
Қордай асуындағы жел электр стансасың келесі үлескері «VISTA INTERNATIONAL» ЖШС болып табылады. Оның қарауындағы 66,9 га орналасқан жел электр стансасында 21 МВт электр қуаты өндіріледі. Серіктестік басшысы Рустам Сағитовтың айтуынша, 2012-2014 ж.ж. аралығында құрылысы жүрген стансаның жобалық құны 6 млрд 362 млн теңгені құраған.
Онда Германиядан жеткізілген қондырғылар орнатылған. Ондағы биік мұнараларды орнатуға 300 тонналық кран да сол елден әкелініпті. Серіктестік екі жылда құны 6 млрд 362 млн теңгенің жобасын іске қосты. Өткен жылдың қорытындысында мұнда сғатына 67 млн кВт электр қуаты өндірілсе, биыл оның қуаты біршама артқан. Мұндағы басқару тетіктері толық автоматтандырылған. Электр қуатты өндірісінің тұтынушысы «Қаржылық-есеп орталығы» ЖШС-не серіктестік электр энергиясын 26,44 теңге тарифімен өткізуде.
Үшінші еншілес компания «ВетроИнвест» ЖШС Қордай асуында 30,65 МВт құрайтын жел стансасын салған. Бұл алдыңғы екі компаньонынан әлде қайда жоғары. Оның жобалық құны 12 млрд 753 млн теңгені құрайды. Станса 258,67 га аумақты алып жатыр. Онда 50 адам жұмыс істейді. Бұл жоба Индустрияландыру картасы және «Бизнестің жол картасы – 2020» бағдарламасы аясында жүзеге асырылыпты. Оның қуаты 150 мыңға жуық халқы бар, облыстағы ең ірі Қордай ауданын электр энергиясымен толық қамтамасыз етуге жетеді.
