Сонымен қатар, бүгінде елімізде де ет бағасының өсуі байқалуда.
Мәжіліс депутаты Гүлдара Нұрымованың айтуынша заңдағы белгіленген шектеулерге қарамастан, тірі малдың заңсыз шығарылу фактілері аз емес.
Мысалы, 2024 жылғы 12-қыркүйекте Қырғызстан
шекарасында Қордай ауданынан 308 бас ірі қара малды заңсыз шығарған азамат ұсталған. Осындай оқиғалар басқа жерлерде де кездеседі.
«Мұндай жағдайлар көлеңкелі экономиканың барын және шекарадағы бақылаудың жеткіліксіздігін көрсетеді. Сонымен бірге, жергілікті тұрғындардың мәліметі бойынша, қасапханаларда малды, оның ішінде ірі қара малды, ұсақ малды, төлдейтін қойларды, сондай-ақ жас малдар мен асыл тұқымды малдарды да сою көбейгені байқалады.
Мал басының азаюы ішкі нарықта еттің тапшылығын туындатып, оның құнын жасанды түрде көтеруде және халықтың әлеуметтік жағдайына кері әсер етуде. Осылай жалғасатын болса, елдегі ет өнімдерінің қолжетімділігі төмендеп, азық-түлік қауіпсіздігіне қатер төнуі мүмкін. Ал отандық ет өңдеу кәсіпорындары шикізат тапшылығына тап болуда» дейді Г. Нұрымова өзінің депутаттық сауалында.
Тағы бір мәселе, шекаралас аудандарда, соның ішінде Қырғызстанмен шекаралас Тұрар Рысқұлов ауданында ұрлаған малды көрші елге айдап әкету жағдайлары жиі кездеседі. Ұсталған кезінде тергеу іс-шаралары мен сот процестері аяқталғанға дейін мал аудан әкімдігінің қарауында болады және малды ұстау үшін қомақты қаржы жұмсалады. Бұл аудан бюджетіне артық қиындық пен шығын тудыратыны белгілі.
Сондықтан депутат ішкі нарықтағы ет бағасын тұрақтандыру бойынша реттеу шараларын қабылдауды ұсынады.
Фото: Qazaquni.kz
