Бүгін Парламент Мәжілісінде өткен Үкіметтік сағатта аграрлық мәселелер комитетінің төрағасы С. Егізбаев өз баяндамасында осындай мәліметтер келтірді.
«Суды үнемді тұтынудың жалпыұлттық мәдениетін қалыптастыру бойынша жүйелі жұмыс жолға қойылмаған. Мұның дәлелі – экономикада және күнделікті өмірде суды пайдаланудағы ысырапшылдық.
Ұлттық экономикада да суды ұтымсыз тұтыну деңгейі өте жоғары. Мысалы, Ресей, АҚШ және Австралиямен салыстырғанда, бізде өнім өндіруге 3 есе көп су жұмсаймыз.
Осы орайда, біздегі негізгі проблема су тапшылығы емес, оны ұтымсыз пайдалану болып тұр.
Мемлекет қабылдап жатқан суды үнемдеу шараларының тиімділігі айтарлықтай нәтиже бермей отыр. Мұның себебі – су пайдаланушылар арасында суды үнемдеуге қатысты салиқалы көзқарасты қалыптастыру бойынша ақпараттық-түсіндіру жұмыстарының жүргізілмеуі. Мектептерде ашық сабақтар өткізу сияқты бір реттік іс-шаралар суды тұтыну мәдениетін қалыптастыру мәселесін шешуде айтарлықтай нәтиже бермейді» деді Мәжіліс депутаты.
Фото: gov.kz
