«Биологиялық қауіпсіздік проблемалары ғылыми-зерттеу институты» ШЖҚ РМК Бас директоры Күнсұлу Закарья елімізде антибиотиктерді орынсыз қабылдаудың зиянын айтты, деп хабарлайды ҚазАқпарат.
Оның пайымынша, аса қауіпті аурулардың қатері мен жаңа инфекциялардың пайда болуы індеттің алдын алу немесе олардың салдарын барынша төмендетуге бағытталған жүйелі шараларды қабылдауды талап етеді. «Сарапшылардың пікіріне қарағанда, бірқатар аса қауіпті аурулар жаһандану мен халықтың белсенді көші-қоны, жабайы жануарлар мен құстардың миграциясына байланысты. Осы орайда аурулар жаңа аумақтарда тез тарайды. Сондықтан аса қауіпті патогендердің алдын алу немесе салдарын төмендету үшін жүйелі түрде түрлі сипаттағы биологиялық қатердің мониторингін жүргізіп, болжау жұмыстарын іске асырған жөн», — деді Күнсұлу Закарья Мәжілістегі дөңгелек үстел отырысында.
Бұл тұрғыда ғалым отандық биопрепараттар мен дәрі-дәрмекті, сондай-ақ қорғаныс құралдарын өндіруді арттыру өте маңызды екенін атап өтті. «Қазіргі кезде антибиотиктерді қадағалаусыз қабылдауды реттеу мәселесі өзекті болып тұр. Биологиялық қауіпсіздіктің барлық мәселелері үшін жалпы үйлестіру күш-жігерін айқындау керек», — деді К. Закарья.
Оның сөзіне қарағанда, антибиотикке төзімді микроағзалардың пайда болуын төмендету үшін медицина мен ауыл шаруашылығында антибиотиктерді қабылдауды реттеу қадамдарын енгізу керек. Бұдан бұрын хабарланғандай, Мәжілісте биологиялық қауіпсіздік мәселелерін талқылауға арналған дөңгелек үстел отырысы өтіп жатыр.
