OECD (Экономикалық ынтымақтастық пен даму ұйымы) және ЕҚДБ (Еуропалық қайта құру және даму банкі) зерттеулері құқықтық реттеудің болжамдылығының төмендігін, бизнеске әкімшілік қысымның сақталуын және бейресми кедергілердің бар екенін атап өтуде.
Премьер-министр О. Бектеновке депутаттық сауал жолдаған Мәжіліс депутаты Аманжол Әлтай экономиканы дамытудың тиімді көздерінің бірі – инвестиция екенін, алайда елімізде бұл бағыттағы істер көңіл көншітпей отырғанын айтты.
2024 жылдың 9 айында елімізге тартылған тікелей шетелдік инвестиция көлемі 12,7 млрд АҚШ долларын құрап, 2023 жылдың осындай кезеңімен салыстырғанда 36%-ға төмендеп кеткен. Әсіресе, ол Ақтөбе, Алматы, Павлодар облыстары мен Алматы қаласында айқын байқалады.
Бұл үрдіс – ел экономикасы үшін алаңдатарлық көрсеткіш. Себебі жеке капитал ағынының төмендеуін мемлекеттік бюджет қаражатымен алмастыру қажеттігі туындап отыр. Сонымен бірге бюджет тапшылығын қосымша құн салығын көтеру арқылы толтыру ұсынылуда. Ал бұл дегеніңіз өз кезегінде қаржылық тұрақтылыққа кері әсерін тигізетіні анық.
А. Әлтай Ұлттық банк пен Ұлттық статистика бюросының мәліметтеріне сүйене отырып, инвестиция тартудың нақты индикаторларын, басымдықтарымен қолдау тетіктерін қамтитын Жол картасын әзірлеуді және әкімшілік кедергілерді қысқарту және инвесторлармен жұмыстың ашықтығын арттыруды ұсынады.
Фото: Dalanews
