Қазақстанның ұлттық құрамасы африкалық Намибия құрамасына қарсы FIFA Series турнирінде ойын өткізді. Ойын өте қиын өткенімен, Қазақстан құрамасы 2:0 есебімен жеңіске жетті. Алғашқы голды 12-минутта Ян Вороговский соқты, ал екінші голды 79-минутта Әлібек Қасым соқты. Бұл ойын қазақ халқы үшін тарихи матчтардың бірі болып саналады. Келесі ойынды Қазақстан құрамасы Комор аралдарына қарсы өткізеді.
Талғат Байсуфинов:
— Иә, ассалаумағалейкум! Баршаңызды жеңіспен құттықтаймын! Біз, әрине, ойынның дәл осылай ауыр өтетінін болжаған едік. Біріншіден, Намибия құрамасының қандай команда екенін білдік. Африкадан келген команда — жылдам ойыншылардан құралған, физикалық тұрғыдан мықты, өте шапшаң. Мұның бәрін, әрине, ескердік.
Бірақ, жоғарыда айтқанымдай, ең бастысы — жеңіс. Екіншіден, бізге ойынымызды тұрақтандыру керек. Бұл — биылғы алғашқы матч, жалпы алғанда жаман емес. Ойыннан кейін талдау жасаймыз, қараймыз. Бірақ жеңіске жеттік, шүкір! Енді келесі ойынға дайындаламыз, сонда көреміз.
— Қақпашыларды неге ауыстырдыңыздар?
— Біз ауыстыру болатынын айтқанбыз. Бізге де ойыншыларды іс жүзінде көру керек. Қақпашыларға келсек, бізде үш қақпашы бар, сол себепті олар әр таймда ойнасын деп келістік. Енді қараймыз.
Ертең жігіттерге демалыс береміз. Олар Қазақстан Премьер-лигасында үш тур ойнап келді, оны да ескердік. Жаңа ғана келді, дайындыққа екі-ақ күн болды — бұл, әрине, аз. Бірақ біраз нәрсені естеріне түсірді.
Қазір талдау жасаймыз, сосын жігіттермен сөйлесеміз. Уақыт бар. Комор аралдары құрамасында да жақсы ойыншылар бар, Франциядан келгендері де бар. Әрине, жігіттер мұны біледі және түсінеді. Қазір бізде уақыт бар. Құдай қаласа, жақсы дайындаламыз.
Дерек көзі-Sports.kz
Фото: olimpbet arena
