Қазір әйелдер барлық салаларда жұмыс істейді. Отбасында ғана емес, жалпы қоғамда да бейбітшілік пен тыныштықтың шырақшысы саналады. Сонау қиын-қыстау жылдарда елдің еңсесін көтеруге атсалысудан бастап, бүгінгідей әлемге танылып, бәсекеге барынша қабілетті мемлекет болуға ұмтылып отырған заманда да әйелдер қауымының қосқан үлесі шексіз. Олардың қоғамдық жұмысқа етене араласуы байқалып, саяси қызметтерде өсуі бекіді, мемлекеттік қызметтерде де нәзік жандылардың салмағы айтарлықтай артып келеді. Мемлекет ісінде жоғары, жауапты қызметтер атқаратын әйелдер қауымы өздерінің білікті басшылығымен ерекшелініп қана қоймай, мемлекет жетістіктеріне де тың серпін беруде.
Дегенмен әйел отбасындағы рөлін ең басты орынға қою қажет. Ол ең алдымен, ана. Жанұяның берекесін келтіріп, оның ұйытқысы болу – олардың әуелгі міндеті. Әйел-ананың бала тәрбиелеуде рухани құндылықтарды меңгерте отырып, ұлтты ұлықтайтын ұрпақ өсіруі – парыз. Қай кезде де бала тәрбиесінің басты тұлғасы – ата-ана болып қала бермек. Сондықтан олар отбасылық дәстүрлерді жаңғыртып, шаңырақ мәртебесін арттыруды басты ұстаным еткені абзал.
Алайда, бүгінгі таңда көптеген әйелдер тұрмыстық зорлық-зомбылықтың құрбанына айналып отыр. Қазақстандағы үйдегі зорлық-зомбылық статистикаға көнбейді, өйткені оның құрбандары құқық қорғау органдарына және дағдарыс орталықтарына өте қауіпті жағдайларда ғана жүгінеді. Жамбыл облыстық «Анаға тағзым» отбасын қолдау орталығы осындай қиын жағдайда тап болған отбасыларына психологиялық, әлеуметтік және құқықтық қызметті ақысыз негізде жүргізеді. Осы тұрғыда орталық (2021 жылдың қазан айында) ашылған уақыттан бері 876 отбасы мүшесіне кеңес беріліп, 50 топтық тренинг өтіп, оларға 1100-ден аса адам қамтылды. Мәселен, 308 адам психологиялық көмек алса, 83 адам заңгерлік кеңес алған.
Одан бөлек, орталық аналардың өз кәсібін ашуға ықпал етуде, мұқтаж аналарды түрлі үйірме-курстарға тартып, аз қамтылған отбасылармен тікелей жұмыс жүргізіп келеді. Бүгінгі таңда орталықта 10 үйірме, 8 курс, 2 клуб пен 2 кеңес беру кабинеті жұмыс істейді. Атқарылған жұмыстың нәтижесінде, ашылған күннен бастап бүгінге дейін орталықтың үйірмелері мен курстарына барлығы 1237 адам қамтылған. Түрлі кәсіби бағыттау курстарына қатысқан 385 әйел-ана сертификат алды: тігін курсына қатысқан — 47, «Тырнақ әрлеу шебері» қысқа мерзімді оқыту курсын аяқтаған — 88, «Бет әрлеу шебері» курсын бітірген — 97, аспаздық курсын бітірген — 98 бітіруші, СММ курсы – 29 адам, «Шаш сәндеу шебері» — 16 адам, бала массажы курсы – 10 әйел-ана.
Фото: Welcome to the United Nations
