Жыл басынан бері Жамбыл облысында мал ұрлығының 39 дерегі тіркеліп, оның 28-і ашылды. Жалпы алғанда жәбірленушілердің полицияға дер кезінде жүгінуі ұрлықты «ізін суытпай» ашуға көмектесетіні рас. Мәселен, жақында Байзақ ауданының тұрғыны өз шаруа қожалығына келіп, 61 жылқысы мен 169 қойының жоғалғанын білген. Ол келтірілген шығын көлемін 36 миллион 680 мың теңгеге бағалады.
Жедел-іздестіру шаралары барысында полиция қызметкерлері оның шопаны болып жұмыс істеген 40 жастағы ер адамды ұстады. Ұсталған азамат өз кінәсін мойындады. Қазіргі уақытта аталған дерек бойынша Қылмыстық кодекстің 189-бабы 4-бөлігімен сотқа дейінгі тергеу амалдары жүргізілуде.
Жамбыл облысы Полиция департаментінің бастығы полиция генерал-майоры Жанат Сүлейменов өзінің Facebook-тегі парақшасында ауыл тұрғындарын қырағы, мұқият болуға және малдарын қараусыз қалдырмауға шақырды.
«Ауыл шаруашылығы – өңір экономикасының негізгі саласы болып қала береді. Ал ауыл-аймақтарда үй жануарларын ұстау — жалғыз табыс көзі десек те болады. Алайда оңай пайда табуды көздейтіндердің кесірінен кейбір отбасылар қиын жағдайға тап болып жатады.
Жамбыл облысының Полиция департаментімен мал ұрлығына қарсы күрес бойынша кешенді іс-шаралар атқарылуда, ауыл тұрғындарымен «Қашар», «Мал ұрлығы» жедел-алдын алу жұмыстары жүргізілуде.
Бұл оқиға барлық шаруалар үшін сабақ болуы тиіс. Сондықтан, күдікті адамдарға сенбеңіздер, шопандармен ресми еңбек шартын жасаңыздар.
Көп жағдайда полицейлер ұрланған емес, жоғалған жануарларды іздеуге тура келеді. Малды қараусыз қалдырмаңыздар, үй жануарларын бірдейлендіріңіздер. Сақтық шараларын орындап, ұрлауға жағдай жасамаңыздар дегім келеді. Осы өзекті мәселені шешу үшін күш-жігерімізді біріктіруіміз қажет» — деп атап өтті Жанат Қуанышұлы
