Мәжіліс депутаты Бақтықожа Ізмұхамбетов депутаттық сауалында мемлекет тарапынан беріліп жатқан арзан несие жеткіліксіз, 2024 жылы «Ауыл аманаты» арқылы қарастырылған қаражат бөлінбегенін жеткізді. Оның өзінде ол кредиттер кепілдікке мүлік беруді талап етеді. Лизинг арқылы жұмыс істеу де қиын, өйткені ауыл азаматтарының алғашқы жарна төлеуге мұршасы жоқ.
«Тауарлық кредит» — жақсы механизм! Соны түсінген кейбір ірі кәсіпкерлер қолында бар малды іскер азаматтарға таратып жұмыс істеп жүр. Бірақ осындай жеке кәсіпкерлердің инициативасын ынталандыратын механизм жасалған жоқ. Ақтөбе облысында «Ауыл партиясының» мүшелері ұйымдастырған «Сауын» бағдарламасын әлеуметтік желіде жарнамалап едім, соңынан тауарлық кредитке мал сұрағандардың саны мыңнан асты. Жұмыс істеймін деген азаматтар, әсіресе ауыл жастары өте көп» дейді Б. Ізмұхамбетов премьер-министрге жолдаған сауалында.
Ия, мемлекеттік бюджет ауыр жағдайда. Үкіметтің беретін ақшасы жоқ. Ол жағы түсінікті! Алайда Қазақстанда қолында малы да, тұқымы да, техникасы да, тіпті ақшасы бар азаматтар көп емес пе? Жер телімі бар, бірақ теңгесі жоқ шаруалар қаншама! Қара тілмен айтқанда — бірінде бар, бірінде жоқ. Ендеше, осы екі топтың бір-бірімен «Тауарлық кредит» арқылы қоян-қолтық жұмыс істеуін неге қамтамасыз ете алмаймыз?
Сондықтан депутат мемлекеттік деңгейде тауарлық кредитті тез әрі өте оңай жолмен беруге бағытталған арнайы бағдарлама жасалуын талап етеді. Ол бағдарлама «Ауыл аманатынан» бөлек болуы тиіс.
Және ол бағдарламада «тауарлық несие» арқылы өз капиталын ауыл азаматтарына беріп, агробизнестің жаңа моделіне көшуге бел буған ірі шаруашылықтарды халықпен тікелей жұмыс істеуге қызықтыратын, ынталандыратын арнайы франшиза ұсыну керек. Ол франшизаның бастапқы жарнасы бюджет арқылы төленіп, қаржылық тәуекелдері мемлекет тарапынан сақтандырылуы керек!
Фото: Sputnik Қазақстан
