Нақтырақ айтсақ, өмірлік қиын жағдайға тап болған отбасылармен жұмыс істеу, тұрмыстық зорлық-зомбылықтың алдын алу, ажырасулардың санын азайту, әлеуметтік жақтан қорғалмаған отбасы балалары мен жанұя мүшелерін қосымша білім беру бағдарламаларына тарту (клубтар, үйірмелер, курстар, саналы ата-аналар мектебі); отбасындағы психологиялық жайсыздықты төмендету, әлеуметтік жақтан қорғалмаған отбасылар мен мүмкіндігі шектеулі мүгедек балалары бар отбасыларды әлеуметтік және психологиялық қолдау, сонымен қатар көп балалы, аз қамтылған, ерекше балаларды тәрбиелеп отырған отбасыларға кешенді консультациялық қызметтер, т.б. ұсына бермек.
Атап айтар болсақ, «Анаға тағзым» орталығы «Мейірім» акциясы аясында орталық қызметкерлері жас сарбаздармен кездесу кешін өткізіп, тұрмыстық зорлық-зомбылыққа тап болған әйелдер және өмірлік қиын жағдайдағы балаларға қуаныш сыйлап қайтты.
Осы жұмыстармен қатар, ұлттық құндылықтарды ұлықтау мақсатындағы іс-шаралар легі тоқтап қалмайды. Керісінше, жаңаша бағытта өрбіп, жалғасын таппақ. Өйткені, ұлттық кодты сақтай отырып, берілген тәлім-тәрбиенің ғұмыры ұзақ болмақ. Қыз тәрбиесі тұтас бір ұлттың тәрбиесін қамтыса, ұрпақ тәрбиесі — ұлт тағдырын шешеді. Отбасын сақтап қалудың өзегі де — ұлттық болмыс пен ұлттық тәрбиеде емес пе?
Алдағы жұмыс жоспарында аймақ халқына қалтқысыз қызмет етуді мақсат тұтқан «Анаға тағзым» отбасын қолдау орталығының жұмысы жандана түспек.
Осы кезге дейін орталықтың көмегіне жүгініп, шарапатын сезінген әрбір әйел, қыз-келіншек өз өмірлерін жаңаша тұрпатта жалғастырып, өздеріне деген сенімдері артып, белгілі бір кәсіп игеріп, жұмыс істеп, нәпақасын тауып жүр. Сондықтан, әрбір келушінің орталықтың көрсетіп жатқан қызметіне айтар алғыстары шексіз.
Фото: kartinki.pics
