Роза Ақылқызы еңбек жолын 1987 жылы бастаған екен. Ал бұл күнде жеткен жетістігі жетерлік. Ол мұғалімдерге арналған Географиядан республикалық Ұлттық интернет олимпиададан ІІ орын дипломын иеленіп, «Ұлы Дала елі» Республикалық этномәдени Форумына үздік жұмыс ұсынғаны үшін марапатталған. Тәжірибелі маман география пәні бойынша мұғалімдерге арналған Республикалық қашықтық олимпиадасынан ІІІ дәрежелі дипломды иеленді. География пәні бойынша республикалық олимпиада жүлдегерлерін дайындап жүр. Елімізде ең алғаш рет өткен І Республикалық «Кемеңгер ұстаз» олимпиадасының да ІІІ дәрежелі жүлдесі Розаның еншісіне бұйырыпты.
«Ұстазы жақсының ұстамы жақсы» дегнедей, Роза Кентайдың шәкірттері де бірнеше жетістіктерге жеткен. Мәселен, Аяулым Білтен мен Әсел Төлепберген Республикалық Ұлттық Интернет Олимпиададан І орын иегерлері атанған. Бұл облыс орталығынан шалғайда жатқан ауыл мектебі үшін үлкен жеңіс. Тағы бір шәкірті Аружан Шайдікерімова «Ұлы Дала елі» Республикалық этномәдени Форумына белсене қатысса, аудандық Пәндік олимпиададан Мереке Қыдырбай ІІІ орын иеленді.
Сондай-ақ, аудандық пәндік олимпиададан бірінші орын, облыстық пәндік олимпиададан үшінші орын иеленген Жанбота Пәрімбек, «Ұлы жеңістің75 жылдығына» шығармашылық байқаудан жеңімпаз атанған Дәулет те Роза Ақылқызының озат шәкірттері.
— Мектебіміздің озат мұғалімі Роза Ақылқызынан жас ұстаздар қауымының, оқушылардың үйренері өте көп. Озат ұстаздың шәкірттері облысты, республиканы мойындатып тұр. Мектебімізге мақтаныш болған оқушылар аз емес. Мәселен, «Инклюзивті қоғам — 2020» І Халықаралық білім мен шығармашылық байқауының ғылыми жоба бойынша жеңімпазы Аянат Мейірбек, Ұлы Жеңістің 75 жылдығына арналған аудандық шығармашылық байқаудан екінші орын иеленген Жанель Орынбай, аудандық «Жас суретші» шығармашылық байқауының жүлдегері Сымбат Жанай секілді шәкірттерімізбен қалай мақтансақ та артық емес, — дейді Жамбыл орта мектебінің директоры Жылжанат Жантайбекова.
