Наурыз қарсаңында мерекелік шараларға шектеу қойылмайды. Бұл туралы ҚР Денсаулық сақтау министрі Ажар Ғиният айтты.
«Қазір эпидахуалдың жақсаруына байланысты барлық шектеу алынып тасталды. Енді бұрынғы ковидсіз өмірді қайта қалпына келтіру керек. Сондықтан барлық мерекелік шараларға шектеу қойылмайды», — деп жауап берді А. Ғиният орталық коммуникациялар қызметіндегі баспасөз мәслихатында тілші сұрағына.
Дегенмен, министр әр адам өз денсаулығын ойлауы керегін, ауырып жүргендер ерікті түрде оқшаулануы қажеттігін айтты. «ЖРВИ немесе қандай да бір тұмаумен ауырып жүргендер адам көп жиналатын орындарға бармағаны дұрыс», — деді Ажар Ғиният.
Айта кетейік, наурыз айында коронавируспен сырқаттану көрсеткіші 33 есе төмендеген. Қазір Қазақстан Республикасы мен барлық өңірлер жасыл аймақта орналасқан.
