Естеріңізде болса, 2024 жылдың мамыр айында кәмелетке толмаған жасөспірімдер арасында дау-жанжал орын алған. Қылмыстық ниетін жүзеге асыру мақсатында С. деген жасөспірім Б. деген жасөспірімнің нұсқауымен темір металды кастетпен қаруланып, жәбірленушінің басының желке тұсынан ұрып, оқиға орнынан бой тасалаған.
Соққының салдарынан жәбірленуші оқиға орнында көз жұмды.
Кінә жәбірленуші тараптың өкілі мен куәлердің айғақтарымен, мамандар мен сарапшылардың қорытындыларымен, заттай дәлелдемелермен дәлелденді.
Прокурор екі жасөспірімнің әрқайсысын 9 жылдан бас бостандығынан айыруды сұрады. Ал, жәбірленуші тарап сотталушыларды қатаң жазалауды сұрады.
Сонымен нұсқау берген жасөспірімнің қылмыстарда бастамашы рөлі ескеріле отырып, қылмыстардың жиынтығы бойынша 11 жылға бас бостандығынан айыру жазасы тағайындалды.
Ал қылмысты жасаған жасөспірімге 9 жылға бас бостандығынан айыру жазасы тағайындалды.
Сотталғандардың адвокаттары тағайындалған жазамен келіспей, нұсқау берген оқушының ақтау, ал қылмысты жасаған оқушының іс-әрекетін қажетті қорғаныс шегінде денсаулығына ауыр зиян келтіруге қайта саралауды сұрады.
Алайда Жамбыл облыстық сотының қылмыстық істер жөніндегі сот алқасының қаулысымен бірінші сатыдағы соттың үкімі өзгеріссіз қалдырылды.
Сот актісі заңды күшіне енді.
Фото: Inbusiness.kz
