Аймақ басшысы мемлекеттік сатып алу саласында заң бұзушылықтарға жол берген аудан, қала әкімдері мен облыстық басқарма басшыларының салаға жауапты орынбасарларының тәртіптік жауапкершілігін қарауды тапсырды.
– Мемлекеттік қаржы әр тиынына дейін тиімді жұмсалуы қажет. Қолға алынған барлық жобалар уақтылы әрі тиімді жүзеге асырылуы тиіс. Мемлекеттік қаражат тек әлеуметтік маңызы бар, халыққа пайдасы тиетін жобаларға ғана бағытталуы керек. Ысырапшылдыққа жол берілмейді. Қажетсіз жобалар үшін қаржы шашу тоқтатылсын. Әр басшы жауапкершілікті сезінсін. Мемлекеттік сатып алу рәсімдері заң талаптарына сай әрі ашық түрде жүзеге асырылуы тиіс, – деді Нұралхан Көшеров.
Әкім, сондай-ақ, жауапты басқармаларға жергілікті атқарушы органдармен бірлесе жұмыс істеуді, түсіндіру жұмыстарын күшейтіп, семинарлар ұйымдастыруды тапсырды. Жүйелі түрде заңнаманы бұзатын әкімдіктер мен басқармалар бойынша рейтинг жасап, тиісті шаралар қабылдау қажеттігін атап өтті.
Облыстық мемлекеттік сатып алу басқармасының басшысы Ақаәділ Сатыбалдының мәліметінше, 2025 жылдың басынан бері басқармаға жалпы сомасы 147,9 млрд теңгені құрайтын 953 өтінім түскен. Оның ішінде: жұмыстарға – 74,4 млрд теңгеге 266 өтінім; қызметтерге – 30,7 млрд теңгеге 378 өтінім; тауарларға – 42,8 млрд теңгеге 309 өтінім.
Қазіргі таңда 140,9 млрд теңгеге 856 мемлекеттік сатып алу рәсімі аяқталған. Қалған 7 млрд теңгеге 97 сатып алу рәсімі жүргізіліп жатыр.
Жиын барысында саладағы нақты кемшіліктерге де тоқталып, сын-ескертпелер айтылды. Облыс әкімі тиісті басшыларға жұмысты ширату, қаржыны тиімді игеру және жобаларды уақтылы аяқтау бойынша нақты тапсырмалар жүктеді. Алдағы уақытта бұл саладағы әрбір әрекет қатаң бақылауда болады.
Сондай-ақ, Төлеби ауданының әкімі Еркеғали Әлімқұловтың төрағалығымен өткен аппараттық жиында инвестиция тарту, салық түсімдерін ұлғайту бағытында атқарылған жұмыстар қаралып, Ленгір, Киелітас, Алатау ауылдық округінің әкімдері осы бағыттағы жұмыстарды баяндады.
Ленгір қаласы бойынша жыл көлемінде 500 млн теңге салық түсімдерін орындау жоспарланса, қазіргі кезде 300 млн теңге орындалған. Салық түсімдерін ұлғайту, инвестиция тарту бағытында 24 жоба жүзеге асып, алты айда 5,5 млрд теңге болады. Жыл соңына дейін көрсетілген меже орындалады деп күтілуде.
Киелітас ауылдық округінде 1 млрд 195 млн теңге инвестиция тартылып, салық түсімдері 66 млн 399 мың теңгені құрады.
Алатау ауылдық округіндегі негізгі капиталға тартылған инвестиция көлемі жылдық жоспар 4 млрд 850 млн теңге болса, қазіргі кезде 957.7 млн теңгеге инвестиция тартылған. Салық түсімі 41737.2 теңгеге орындалған.
Тағы бір айтары, Төлеби ауданында қаржылық сауаттылықты арттыруға арналған «ХХІ ғасырдың қаржылық триггерлері» атты ақпараттық-танымдық форум өтті.
Форумның мақсаты — Мемлекет басшысы Қасым-Жомарт Кемелұлы Тоқаевтың «Заң және тәртіп» қағидасын қоғамда кеңінен насихаттау, азаматтардың қаржылық қауіпсіздігін күшейту, сондай-ақ қаржылық пирамидалар мен түрлі алаяқтық схемаларға қарсы қоғамдық иммунитет қалыптастыру.
Ауқымды шараға аудан әкімдігі жанынан құрылған мобильді ақпараттық-насихат тобының мүшелері, мемлекеттік мекемелердің қызметкерлері, құқық қорғау органдарының өкілдері, колледж ұстаздары, ардагерлер, жастар және аудан тұрғындары қатысты.
Форумды Төлеби ауданы әкімі аппаратының басшысы Амалбек Өміртай ашып, қоғамда алаяқтық әрекеттердің алдын алу, халықтың құқықтық және қаржылық сауаттылығын арттыру бағытында атқарылып жатқан жұмыстарға тоқталды.
Шара барысында №9 колледж директорының тәрбие ісі жөніндегі орынбасары баяндама жасап, қаржылық пирамида мен интернет алаяқтықтың кең таралуы, одан сақтану жолдары, сондай-ақ жеке деректердің қауіпсіздігі мен қаржыны басқару мәдениетінің маңыздылығы туралы нақты мысалдар келтіріп, қатысушыларға құнды ақпарат ұсынды.
Форум соңында көшпелі қоғамдық қабылдау өткізіп, қатысушылар спикерлерге өз сауалдарын қойып, еркін пікір алмасып, ұсыныстарын жеткізді.
Фото: Liter.kz
